വരാപ്പുഴ: മക്കളുടെ ചികിത്സയ്ക്ക് പണമില്ലാത്തതിനാല്‍ അവയവങ്ങള്‍ വില്‍ക്കാന്‍ തയ്യാറാണെന്ന് അമ്മ ബോര്‍ഡ് എഴുതിവെച്ച സംഭവം വാര്‍ത്തയായതോടെ ഇടപെട്ട് സര്‍ക്കാര്‍. വരാപ്പുഴ സ്വദേശിനിയായ ശാന്തിയാണ് അഞ്ച് മക്കളുമായി തെരുവില്‍ ഇറങ്ങിയത്. ആരോഗ്യമന്ത്രി കെ കെ ശൈലജ ശാന്തിയുമായി സംസാരിച്ചു. തുടര്‍ന്ന് മക്കളുടെ ചികിത്സ സര്‍ക്കാര്‍ ഏറ്റെടുക്കുമെന്ന് അറിയിച്ചു. കൂടാതെ വീടിന്റെ വാടക ലയണ്‍സ് ക്ലബ് ഏറ്റെടുക്കുമെന്ന് അറിയിച്ചതോടെ ശാന്തിയും മക്കളും വാടക വീട്ടിലേക്ക് മാറാനും ധാരണയായി.
കൊച്ചി കണ്ടെയ്നര്‍ റോഡില്‍ ടാര്‍പ്പോളിന്‍ വലിച്ചുകെട്ടിയ ഷെഡ്ഡിലാണ് ഇവര്‍ കഴിഞ്ഞുവന്നത്.
ഇവരുടെ അഞ്ച് മക്കള്‍ക്കും വിവിധതരത്തിലുള്ള ആരോഗ്യപ്രശ്നങ്ങളുണ്ട്. മൂന്ന് പേര്‍ക്ക് വലിയ ശസ്ത്രക്രിയകള്‍ കഴിഞ്ഞതാണ്. ഇവരുടെ ചികിത്സയ്ക്ക് പണമില്ലാതെ വന്നതോടെയാണ് ഇത്തരത്തിലൊരു നീക്കത്തിലേക്ക് കടക്കാന്‍ ശാന്തിയെ പ്രേരിപ്പിച്ചത്. കിടപ്പാടം പോലും ചികിത്സയ്ക്ക് വേണ്ടി വില്‍ക്കേണ്ടിവന്നു. ഇരുപത് ലക്ഷം രൂപയോളം കടമുണ്ട്. ‘ മക്കളുടെ ചികിത്സാ സഹായത്തിനും കടബാധ്യതകള്‍ തീര്‍ക്കാന്‍ വേണ്ടിയും അമ്മയുടെ ശരീര അവയവങ്ങള്‍ (ഹൃദയം) ഉള്‍പ്പെടെ വില്‍പ്പനയ്ക്ക് ‘ എന്ന് റോഡരികില്‍ ബോര്‍ഡെഴുതി വച്ചാണ് ശാന്തി ഇക്കാര്യം ലോകത്തെ അറിയിച്ചത്.