Wednesday, February 19th, 2020

പൊന്‍പറ കൊണ്ട് സ്‌നേഹമളന്ന്…

പഠിച്ചിറങ്ങിയ വിദ്യാലയത്തില്‍ സ്‌നേഹവിരുന്നൊരുക്കി ഷബീര്‍

Published On:Nov 14, 2018 | 10:00 am

പ്രദീപന്‍ തൈക്കണ്ടി
കണ്ണൂര്‍: പഠിച്ചിറങ്ങിയ വിദ്യാലയത്തില്‍ സ്‌നേഹവിരുന്നൊരുക്കി വിദ്യാര്‍ത്ഥി ശ്രദ്ധേയനായി. പാപ്പിനിശ്ശേരി കാട്ടിലെ പള്ളിയില്‍ അബൂബക്കറിന്റെയും സാബിറയുടെയും ഇളയമകന്‍ ഷബീറാണ് താന്‍ പത്ത് വര്‍ഷത്തോളം പഠിച്ച തോട്ടട ആശ്രയം സ്‌പെഷല്‍ സ്‌കൂളില്‍ സ്‌നേഹ വിരുന്നൊരുക്കിയത്. സന്തോഷവും സൗഹാര്‍ദ്ദവും അലയടിച്ചുയര്‍ന്ന നിഷ്‌ക്കളങ്ക മനസുകളുടെ കൂടിച്ചേരലിന്റെ സ്‌നേഹപ്പകര്‍ച്ച പൊന്‍പറ കൊണ്ട് അളന്നാലും മതിയാവില്ലെന്ന് സംഗമത്തില്‍ പങ്കെടുത്ത അധ്യാപകരും രക്ഷാകര്‍ത്താക്കളും ഉള്‍പ്പെടെയുള്ളവര്‍ക്കും മനസിലായി.
മാനസിക വെല്ലുവിളി നേരിടുന്ന ഷബീര്‍ പതിനാല് വര്‍ഷങ്ങള്‍ക്ക് മുമ്പ് തന്റെ പത്താമത്തെ വയസ്സിലാണ് ആശ്രയ സ്‌പെഷല്‍ സ്‌കൂളിലെത്തിയത്. സ്വന്തമായി യാതൊരു പ്രവൃത്തിയും ചെയ്യാനാവാതെ പ്രയാസത്തിലായിരന്ന ഷബീര്‍ പടിപടിയായി വളരുകയായിരുന്നു. സംസാരിക്കുന്നത് പോലും മനസ്സിലാക്കാന്‍ പ്രയാസമായിരുന്നു. ഹൈപ്പര്‍ ആക്ടിവിറ്റീസും ഉണ്ടായിരുന്നു. ആശ്രയയിലെ പരിശീലനത്തിലൂടെ ഷബീര്‍ വളര്‍ന്നു. മികച്ച വിദ്യാര്‍ത്ഥിയായി 2004 ല്‍ ഷബീര്‍ പുറത്തിറങ്ങി.
ഇന്ന് ഷബീര്‍ വളപട്ടണം വെസ്‌റ്റേണ്‍ ഇന്ത്യാ പ്ലൈവുഡ് ഫാക്ടറിയിലെ സ്ഥിരം തൊഴിലാളിയാണ്. ഒക്ടോബര്‍ മാസമാണ് ഷബീറിനെ ഫാക്ടറിയിലെ സ്ഥിരം തൊഴിലാളിയായി നിയമിച്ചത്. ആദ്യമാസത്തെ ശമ്പളം കിട്ടിയപ്പോള്‍ ആ തുക ആശ്രയയിലെ വിദ്യാര്‍ത്ഥികള്‍ക്ക് ഉച്ചഭക്ഷണം നല്‍കുന്നതിനായി തീരുമാനിക്കുകയായിരുന്നു. പിതാവ് അബൂബക്കര്‍ വെസ്‌റ്റേണ്‍ ഇന്ത്യയില്‍ തൊഴിലാളിയായിരുന്നു. പിതാവിനൊപ്പം ഷബീര്‍ 2007 മുതല്‍ ജോലി പഠിക്കാനായി ഫാക്ടറിയില്‍ പോയി തുടങ്ങിയിരുന്നു. കമ്പനി മാനേജിംഗ് ഡയരക്ടര്‍ മായിന്‍ മുഹമ്മദിന്റെയും സഹ തൊഴിലാളികളുടെയും പ്രോത്സാഹനവും സഹകരണവും ഷബീറിന് ജോലി പഠിച്ചെടുക്കുന്നതിന് തുണയായി. അങ്ങനെയാണ് ഒക്ടോബറില്‍ ഷബീറിനെ സ്ഥിരം തൊഴിലാളിയായി നിയമിച്ചത്. സ്‌കൂള്‍ വിട്ടതിന് ശേഷവും ഷബീറും കുടുംബവും ഇടക്കിടെ ആശ്രയയില്‍പോകാറുണ്ടായിരുന്നു. ഇന്നലെ അത് സ്‌നേഹസദ്യയുമായി എന്ന് മാത്രം. തന്റെ കൂട്ടുകാരെ കാണാന്‍ ഇനിയും ആശ്രയയിലെത്തുമെന്ന് പറഞ്ഞാണ് ഷബീര്‍ പടിയിറങ്ങിയത്.

LIVE NEWS - ONLINE

  • 1
    3 mins ago

    ഷൈനി സ്റ്റാറായി; ഓര്‍മ്മകളില്‍ നീന്തിത്തുടിച്ചു: വില്‍സന്‍

  • 2
    6 mins ago

    ഇടനെഞ്ച് പൊട്ടിയ വേദനയോടെ വത്സരാജ് പറഞ്ഞു, അവളെ തൂക്കിലേറ്റണം…

  • 3
    1 hour ago

    ബൈക്കുകള്‍ കൂട്ടിയിടിച്ച് അപകടം; ഒരാള്‍ മരിച്ചു

  • 4
    2 hours ago

    തോക്കുകളും ഉണ്ടയും കാണാതായിട്ടില്ല

  • 5
    2 hours ago

    പുല്‍വാമയില്‍ ഏറ്റുമുട്ടലില്‍ മൂന്ന് ഭീകരരെ ഇന്ത്യന്‍ സൈന്യം വധിച്ചു

  • 6
    2 hours ago

    ഇന്ത്യാ സന്ദര്‍ശന വേളയില്‍ വ്യാപാരക്കരാര്‍ ഉണ്ടാകില്ല: ട്രംപ്

  • 7
    3 hours ago

    പ്രവാസി മലയാളികള്‍ക്ക് കുവൈത്ത് എയര്‍വെയ്‌സില്‍ നിരക്കിളവ്

  • 8
    3 hours ago

    വര്‍ക്കലയില്‍ റിസോര്‍ട്ടിന് തീപിടിച്ചു

  • 9
    6 hours ago

    കണ്ണൂരില്‍ ഒന്നര വയസുകാരനെ കൊന്നത് കാമുകനൊപ്പം ജീവിക്കാന്‍; അമ്മ അറസ്റ്റില്‍