കാസര്‍കോട്: പുകയില ഉല്‍പ്പന്നങ്ങളുടെ വില്‍പന തടയുന്നതിന് പരിശോധന ശക്തമാക്കുന്നു. ജില്ലാ കളക്ടര്‍ പി എസ് മുഹമ്മദ്‌സഗീറിന്റെ അധ്യക്ഷതയില്‍ കളക്ടറുടെ ചേമ്പറില്‍ ചേര്‍ന്ന ജില്ലാതല യോഗത്തിലാണ് തീരുമാനം. ഇതിനായി എ ഡി എമ്മിന്റെ നേതൃത്വത്തില്‍ ജില്ലാതല സ്‌ക്വാഡ് രൂപീകരിക്കും. പുകയില രഹിത കാസര്‍കോട് പദ്ധതി ഊര്‍ജിതപ്പെടുത്തുന്നതിന് ജില്ലാഭരണകൂടത്തിന്റെ നേതൃത്വത്തില്‍ ആരോഗ്യവകുപ്പിന്റേയും ഇതര വകുപ്പുകളുടേയും വിവിധ സന്നദ്ധ സംഘടനകളുടേയും സഹകരണത്തോടെ നടപടി സ്വീകരിക്കും. അയല്‍ സംസ്ഥാനങ്ങളില്‍ നിന്ന് നിരോധിത പുകയില ഉല്‍പ്പന്നങ്ങള്‍ കടത്തിക്കൊണ്ടു വന്ന് വില്‍പന നടത്തുന്നത് തടയും. റവന്യൂ, … Continue reading "പുകയില ഉല്‍പ്പന്നങ്ങള്‍: പരിശോധന ശക്തമാക്കും"
Saturday, November 17th, 2018
പുകയില ഉല്‍പ്പന്നങ്ങള്‍: പരിശോധന ശക്തമാക്കും
Published On:Oct 18, 2013 | 12:43 pm
കാസര്‍കോട്: പുകയില ഉല്‍പ്പന്നങ്ങളുടെ വില്‍പന തടയുന്നതിന് പരിശോധന ശക്തമാക്കുന്നു. ജില്ലാ കളക്ടര്‍ പി എസ് മുഹമ്മദ്‌സഗീറിന്റെ അധ്യക്ഷതയില്‍ കളക്ടറുടെ ചേമ്പറില്‍ ചേര്‍ന്ന ജില്ലാതല യോഗത്തിലാണ് തീരുമാനം. ഇതിനായി എ ഡി എമ്മിന്റെ നേതൃത്വത്തില്‍ ജില്ലാതല സ്‌ക്വാഡ് രൂപീകരിക്കും.
പുകയില രഹിത കാസര്‍കോട് പദ്ധതി ഊര്‍ജിതപ്പെടുത്തുന്നതിന് ജില്ലാഭരണകൂടത്തിന്റെ നേതൃത്വത്തില്‍ ആരോഗ്യവകുപ്പിന്റേയും ഇതര വകുപ്പുകളുടേയും വിവിധ സന്നദ്ധ സംഘടനകളുടേയും സഹകരണത്തോടെ നടപടി സ്വീകരിക്കും. അയല്‍ സംസ്ഥാനങ്ങളില്‍ നിന്ന് നിരോധിത പുകയില ഉല്‍പ്പന്നങ്ങള്‍ കടത്തിക്കൊണ്ടു വന്ന് വില്‍പന നടത്തുന്നത് തടയും. റവന്യൂ, പോലീസ്, എക്‌സൈസ്, ഭക്ഷ്യസുരക്ഷാ വകുപ്പ്, തദ്ദേശസ്വയംഭരണ സ്ഥാപനങ്ങള്‍, വിദ്യാഭ്യാസ വകുപ്പ് തുടങ്ങിയവയുടെ സഹകരണത്തോടെയാണ് പദ്ധതി നടപ്പാക്കുക. പൊതുസ്ഥലത്ത് പുകവലിക്കുന്നവരെ കണ്ടെത്താന്‍ ജില്ലാതലത്തിലും പ്രാദേശികതലത്തിലും സ്‌ക്വാഡുകള്‍ രൂപീകരിക്കും.
പാന്‍മസാല വില്‍പന കേന്ദ്രങ്ങളില്‍ റെയ്ഡ് നടത്തി കുറ്റക്കാര്‍ക്കെതിരെ കര്‍ശന നടപടി സ്വീകരിക്കും. ജില്ലയിലെ എല്ലാ സ്‌ക്കൂളുകളിലും പുകയില നിയന്ത്രണ സൂചനാ ബോര്‍ഡുകള്‍ സ്ഥാപിക്കുമെന്ന് ഉറപ്പാക്കും. വിദ്യാലയങ്ങളുടെ നൂറുവാര ചുറ്റളവില്‍ പുകയില ഉല്‍പ്പന്നങ്ങളുടെ വില്‍പന നിരോധനം കര്‍ശനമായി നടപ്പാക്കും. സ്‌ക്കൂള്‍ സംരക്ഷണസമിതികളുടെ നേതൃത്വത്തില്‍ ബോധവല്‍ക്കരണ പരിപാടികള്‍ നടത്തും. പുകയില പരസ്യങ്ങള്‍ക്കെതിരെ കടയുടമകള്‍ക്കെതിരെ നോട്ടീസ് നല്‍കും. വ്യാപാരി വ്യവസായികളുടേയും ഉദ്യോഗസ്ഥരുടേയും സംയുക്ത യോഗം വിളിച്ചു ചേര്‍ക്കാനും ജില്ലാതല യോഗം തീരുമാനിച്ചു.
