സംസ്ഥാനത്ത് അതിരൂക്ഷമായ വൈദ്യുതി പ്രതിസന്ധി പരിഹരിക്കാന്‍ ഫലപ്രദമായ പദ്ധതികളില്ലാത്തത് സമീപഭാവിയില്‍ തന്നെ കേരളം ഇരുട്ടിലേക്ക് നീങ്ങുമെന്നതിന്റെ വ്യക്തമായ സൂചനകളാണ്. വര്‍ദ്ധിച്ചു വരുന്ന കേരളത്തിന്റെ ആവശ്യകത കണക്കിലെടുത്ത് വൈദ്യുതി ലഭ്യമാക്കാനുള്ള ആസൂത്രണമോ പ്രവര്‍ത്തനങ്ങളോ ഇല്ലാത്തതാണ് പ്രതിസന്ധി രൂക്ഷമാക്കിയത്.
വൈദ്യുതി ഉപയോഗം നിമിഷം പ്രതി ഏറിവരുന്ന കാലമാണിത്. കണക്കുകള്‍ സൂചിപ്പിക്കുന്നത് കേരളത്തില്‍ വൈദ്യുതി ഉപഭോഗത്തിന്റെ വാര്‍ഷിക വര്‍ധനവ് 8 ശതമാനമാണ്. 150 കോടി യൂണിറ്റ് വീതം വൈദ്യുതി ഓരോ വര്‍ഷവും അധികമായി വേണ്ടിവരുന്നു. വിവിധ മേഖലകളില്‍ നിന്നുള്ള വൈദ്യുതി ഉല്‍പ്പാദനം കഴിച്ചാല്‍ കോടിക്കണക്കിന് യൂണിറ്റ് വൈദ്യുതി പുറമെ നിന്ന് വാങ്ങേണ്ട അവസ്ഥയിലൂടെയാണ് കേരളം കടന്നുപോയിക്കൊണ്ടിരിക്കുന്നത്. ഈയൊരു സാഹചര്യത്തില്‍ പ്രതിസന്ധി മുറിച്ചു കടക്കാന്‍ വ്യക്തമായ ആസൂത്രണവും പദ്ധതികളും ആവശ്യമായി വരുന്ന കാലഘട്ടം കൂടിയാണിത്. കര്‍ണ്ണാടകയില്‍ നിന്ന് 200 മെഗാവാട്ട് വൈദ്യുതി വാങ്ങാന്‍ ധാരണയാക്കിയതായിരുന്നു. എന്നാല്‍ ധാരണ പ്രകാരം വൈദ്യുതി ലഭിച്ചില്ല. എന്നു മാത്രവുമല്ല സംസ്ഥാനത്തെ വൈദ്യുതി പ്രതിസന്ധി മറിക്കടക്കാന്‍ ദക്ഷിണേന്ത്യന്‍ സംസ്ഥാനങ്ങളില്‍ നിന്നുമാത്രം വൈദ്യുതി വാങ്ങുകയെന്ന നിലപാടുകളും പ്രതിസന്ധി മൂര്‍ച്ഛിപ്പിക്കുകയാണ്. വൈദ്യുതി മിച്ചമുള്ള ഒട്ടേറെ ഉത്തരേന്ത്യന്‍ സംസ്ഥാനങ്ങളുണ്ട്. ഛത്തീസ് ഗഡ്, ഒഡീഷ, അസം എന്നിവ മിച്ച സംസ്ഥാനങ്ങളാണെന്നിരിക്കെ ഇത്തരം സംസ്ഥാനങ്ങളുമായി കേരളം ഇതേ വരെ ധാരണാപത്രത്തില്‍ ഒപ്പിട്ടിട്ടുമില്ല. ദക്ഷിണേന്ത്യന്‍ സംസ്ഥാനങ്ങളെ മാത്രമാണ് ആശ്രയിക്കുന്നത്. അവര്‍ക്കാണെങ്കില്‍ വേണ്ടവിധത്തില്‍ കേരളത്തെ സഹായിക്കാനുമാകുന്നില്ല.
വൈദ്യുതിയുടെ ആവശ്യകത ഭീമമായി വര്‍ധിച്ചു വരുന്ന സാഹചര്യത്തില്‍ വൈദ്യുതി ഉല്‍പ്പാദനത്തിനുള്ള എല്ലാ ശ്രോതസ്സുകളെയും പരമാവധി ഉപയോഗപ്പെടുത്തിയേ മതിയാവൂ. പരമ്പരാഗത ഊര്‍ജ്ജ ശ്രോതസ്സുകളെ മാത്രം ആശ്രയിച്ച് മുന്നോട്ട് പോകാന്‍ സാധിക്കില്ലെന്നത് സുവ്യക്തമാണ്. ഇന്നത്തെ നിലയില്‍ മാറ്റമുണ്ടാകണമെങ്കില്‍ പുതിയ മേഖലകളിലേക്ക് കടന്നു ചെല്ലുക തന്നെ വേണം. സര്‍ക്കാര്‍ തലത്തിലും വകുപ്പ് തലത്തിലും ഇതേ കുറിച്ച് ഗൗരവമേറിയ ചര്‍ച്ചകള്‍ നടക്കുന്നില്ലെങ്കില്‍ വൈദ്യുതിയുടെ കാര്യത്തില്‍ കേരളത്തിന്റെ ഭാവി ഇരുളടഞ്ഞതു തന്നെയാകാനാണ് സാധ്യത.
വൈദ്യുതി ഉപയോഗത്തിന്റെ കാര്യത്തില്‍ ചില നിയന്ത്രണങ്ങള്‍ ഉണ്ടായേ മതിയാവൂ. ഇക്കാര്യത്തില്‍ ധൂര്‍ത്തും ഇല്ലാതില്ല. ആവശ്യത്തിന് ഉപയോഗിക്കേണ്ട സ്ഥാനത്ത് പലയിടങ്ങളിലും അമിതവൈദ്യുതി ഉപയോഗം പ്രകടമാണ്. അല്പം മനസ്സുവെച്ചാല്‍ വൈദ്യുതി ഉപയോഗം നിയന്ത്രിക്കാന്‍ സാധിക്കുന്ന ഒട്ടേറെ മേഖലകളുണ്ട്. അനാവശ്യമായി കറന്റ് കളയുന്ന പ്രവണത പലയിടങ്ങളിലും കാണാന്‍ സാധിക്കുന്നുണ്ട്. വീടുകളിലും ഓഫീസുകളിലും പൊതുയിടങ്ങളിലുമെല്ലാംതന്നെ അല്പം മനസ്സുവെച്ചാല്‍ വൈദ്യുതി ഏറെ ലഭിക്കാന്‍ കഴിയും. വീടുകളിലായാലും, ഓഫീസുകളിലായാലും അനാവശ്യമായി കറങ്ങിക്കൊണ്ടിരിക്കുന്ന ഫാനുകള്‍ ഇന്ന് പതിവ് കാഴ്ചയാണ്. പൊതുയിടങ്ങളും വൈദ്യുതി ധൂര്‍ത്തിന്റെ കൂത്തരങ്ങായി മാറിക്കൊണ്ടിരിക്കുകയാണ്. കേരളത്തിന്റെ ഏതാണ്ടെല്ലാ നഗരങ്ങളിലും ഗ്രാമങ്ങളിലും അമിത ഉപയോഗവും ധൂര്‍ത്തും ഏറിവരികയാണെന്നത് തര്‍ക്കമറ്റ വിഷയമാണ്. എത്ര മെഗാവാട്ട് വൈദ്യുതി ഇത്തരത്തില്‍ പാഴായിപ്പോകുന്നുണ്ടെന്ന വ്യക്തമായ കണക്കുമില്ല. നാളെയ്ക്ക് മുന്‍ കരുതലായി സൂക്ഷിക്കേണ്ട വൈദ്യുതി അശ്രദ്ധക്കുറവ് കൊണ്ടോ അലംഭാവം കൊണ്ടോ പാഴായിപ്പോകുന്നത് കേരളത്തിന്റെ പരിഛേദമായി മാറുകയാണ്.
ഇത്തരമൊരു സാഹചര്യത്തില്‍ കേരളത്തില്‍ വര്‍ദ്ധിച്ചുവരുന്ന ആവശ്യകത കണക്കിലെടുത്ത് എന്തെങ്കിലും മാറ്റങ്ങള്‍ ആലോചിച്ചേമതിയാവൂ. എന്നും പരമ്പരാഗത ഊര്‍ജ്ജശ്രോതസ്സുകളില്‍ ഊറ്റംക്കൊള്ളുകയല്ല വേണ്ടത്. ക്രിയാത്മകമായ പദ്ധതികള്‍ ആവിഷ്‌കരിക്കുകയാണ് വേണ്ടത്. അതു വഴി മാത്രമേ കേരളത്തിന്റെ ഊര്‍ജ്ജ പ്രതിസന്ധി മറികടക്കാന്‍ സാധിക്കുകയുള്ളൂ.