തൃശൂര്‍: മുന്‍ഷി എന്ന ടെലിവിഷന്‍ പരിപാടിയിലൂടെ പ്രേക്ഷകര്‍ക്കു പ്രിയങ്കരനായി മാറിയ മുന്‍ഷി വേണു അന്തരിച്ചു. ഗുരുതരമായ വൃക്ക രോഗം ബാധിച്ച് ഏറെ നാളായി ചികിത്സയിലായിരുന്നു. അവിവാഹിതനാണ്. സംസ്‌കാരം ശനിയാഴ്ച. ബന്ധുക്കളൊന്നും അധികമില്ലാത്ത വേണു തിരുവനന്തപുരം വഴുതക്കാട് സ്വദേശിയാണ്. ചലച്ചിത്ര മോഹവുമായി ചെറുപ്പത്തിലേ അലഞ്ഞുതിരിഞ്ഞ വേണുവിന് ഒടുവില്‍ ചലച്ചിത്ര പരിപാടിയായ മുന്‍ഷിയില്‍ അഭിനയിക്കാന്‍ അവസരം ലഭിക്കുകയായിരുന്നു. രണ്ടു വര്‍ഷത്തോളം മുന്‍ഷിയിലൂടെ വേണു തിളങ്ങി. കമല്‍ സംവിധാനം ചെയ്ത പച്ചക്കുതിരയിലൂടെ ദിലീപിനൊപ്പം അഭിനയിച്ചായിരുന്നു സിനിമയില്‍ തുടക്കം. പിന്നീടങ്ങോട്ട് ചെറുതും വലുതുമായി അറുപതിലധികം ചിത്രങ്ങളില്‍ വേണു അഭിനയിച്ചു. തിളക്കത്തിലെയും, ഛോട്ടാ മുംബൈയിലെയുമൊക്കെ വേഷങ്ങള്‍ ശ്രദ്ധേയമായി. സിനിമ ലോകത്തിന്റെ ഇടവേളകളില്‍ പലപ്പോഴും, നിര്‍മ്മാതാക്കളുടെ കാരുണ്യത്തിലായിരുന്നു വേണുവിന്റെ ജീവിതം.
പത്തുവര്‍ഷത്തോളമായി ചാലക്കുടിയിലെ ഒരു ലോഡ്ജിലായിരുന്നു താമസം. ഇതിനിടെയാണ് വൃക്കരോഗം തിരിച്ചറിഞ്ഞത്. കയ്യിലുണ്ടായിരുന്ന തുക മുഴുവന്‍ ചികിത്സക്കായി ചെലവഴിച്ച വേണു അവസാനകാലത്ത് സുമനസുകളുടെ സഹായത്താലാണ് ജീവിതം തള്ളി നീക്കിയത്. രോഗം പിടിപ്പെട്ടതോടെ അഭിനയിക്കാന്‍ ആരും വിളിക്കാതായി. പണം നല്‍കാന്‍ കഴിയാതെ വന്നതോടെ ലോഡ്ജില്‍ നിന്നു താമസം മാറ്റി. സിനിമ സംഘടനയായ അമ്മയില്‍ അംഗത്വമില്ലാത്തതിനാല്‍ സംഘടനയുടെ സഹായവും ലഭിച്ചില്ല. മുറിവാടക കൊടുക്കാനില്ലാത്തപ്പോള്‍ കടത്തിണ്ണയില്‍ കിടന്നും വേണു അന്തിയുറങ്ങിയിട്ടുണ്ട്. സിനിമയിലെ അവസരങ്ങള്‍ നിലച്ചതോടെയാണ് വേണു തീര്‍ത്തും പ്രതിസന്ധിയിലായത്. ആരോരുമില്ലാതെ തെരുവിലൂടെ അലഞ്ഞ വേണുവിന് ഗുരുതര രോഗം കൂടി ബാധിച്ചതോടെ നില കൂടുതല്‍ വഷളായി. തെരുവില്‍ അലഞ്ഞ വേണുവിനെ നാട്ടുകാര്‍ തിരിച്ചറിതോടെയാണ് പാലിയേറ്റീവ് കെയറിലെത്തിക്കുകയായിരുന്നു.