മദ്യനിരോധനത്തിന്റെ മറവില്‍ വ്യാപകമായി സ്പിരിറ്റ് ഒഴുകുമെന്ന് നേരത്തെ ചൂണ്ടിക്കാട്ടിയതാണ്. അതു തന്നെയാണിപ്പോള്‍ സംഭവിച്ചു കൊണ്ടിരിക്കുന്നത്. ബാറുകള്‍ പൂട്ടാന്‍ ഇനി എട്ട് ദിവസം മാത്രം ബാക്കിനില്‍ക്കെയാണ് കേരളത്തിലേക്ക് സ്പിരിറ്റ് കടത്ത് വ്യാപകമാവുന്നത്. തെന്മലയില്‍ ഏഴായിരത്തി അഞ്ഞൂറ് ലിറ്റര്‍ സ്പിരിറ്റ് പിടികൂടിയത് പിടിക്കപ്പെടുന്ന സംഭവങ്ങളില്‍ ചിലതുമാത്രമാണ്. സോഡിയം സിലിക്കേറ്റ് എന്ന് രേഖപ്പെടുത്തിയ വാഹനത്തില്‍ കടത്തവെയാണ് എക്‌സൈസ് സംഘം തെന്മലയില്‍ വെച്ച് സ്പിരിറ്റ് കസ്റ്റഡിയിലെടുത്തത്. ടാങ്കര്‍ ലോറിയുടെ രഹസ്യ അറയില്‍ സൂക്ഷിച്ച് കടത്തുകയായിരുന്നു സ്പിരിറ്റ്. … Continue reading "സ്പിരിറ്റ് കടത്തുകാരും വ്യാജ മദ്യലോബിയും തലപൊക്കുന്നു"
Monday, September 24th, 2018
സ്പിരിറ്റ് കടത്തുകാരും വ്യാജ മദ്യലോബിയും തലപൊക്കുന്നു
Published On:Sep 13, 2014 | 2:22 pm
മദ്യനിരോധനത്തിന്റെ മറവില്‍ വ്യാപകമായി സ്പിരിറ്റ് ഒഴുകുമെന്ന് നേരത്തെ ചൂണ്ടിക്കാട്ടിയതാണ്. അതു തന്നെയാണിപ്പോള്‍ സംഭവിച്ചു കൊണ്ടിരിക്കുന്നത്.
ബാറുകള്‍ പൂട്ടാന്‍ ഇനി എട്ട് ദിവസം മാത്രം ബാക്കിനില്‍ക്കെയാണ് കേരളത്തിലേക്ക് സ്പിരിറ്റ് കടത്ത് വ്യാപകമാവുന്നത്. തെന്മലയില്‍ ഏഴായിരത്തി അഞ്ഞൂറ് ലിറ്റര്‍ സ്പിരിറ്റ് പിടികൂടിയത് പിടിക്കപ്പെടുന്ന സംഭവങ്ങളില്‍ ചിലതുമാത്രമാണ്. സോഡിയം സിലിക്കേറ്റ് എന്ന് രേഖപ്പെടുത്തിയ വാഹനത്തില്‍ കടത്തവെയാണ് എക്‌സൈസ് സംഘം തെന്മലയില്‍ വെച്ച് സ്പിരിറ്റ് കസ്റ്റഡിയിലെടുത്തത്. ടാങ്കര്‍ ലോറിയുടെ രഹസ്യ അറയില്‍ സൂക്ഷിച്ച് കടത്തുകയായിരുന്നു സ്പിരിറ്റ്. അനധികൃത വിപണിയില്‍ ഇരുന്നൂറ്റി അന്‍പത് രൂപയോളം വിലയുള്ള സ്പിരിറ്റ് നൂറ്റിഅന്‍പത് രൂപയിലേക്ക് താഴ്ന്നതു തന്നെ സ്പിരിറ്റ് കടത്തിന്റെ വൈപുല്ല്യം എത്രത്തോളമാണെന്ന് ബോധ്യപ്പെടുത്തുന്നു. സ്പിരിറ്റ് മാത്രമല്ല കേരളത്തിലേക്കൊഴുകുന്നത്. ഇതിനും പുറമെ വ്യാജ ഹോളോഗ്രാം പതിച്ച രണ്ടാം നിര മദ്യവും അതിര്‍ത്തി കടന്ന് കേരളത്തിലേക്ക് ഒഴുകുകയാണ്. ഓണം അടുത്തതോടെയാണ് ഈ കടത്തെന്നതും ശ്രദ്ധേയമാണ്. അതിര്‍ത്തി ചെക്ക്‌പോസ്റ്റ് വഴിയാണ് സ്പിരിറ്റും വ്യാജമദ്യവും കേരളത്തിലേക്ക് കടത്തിക്കൊണ്ടുവരുന്നത്. തെന്മലയില്‍ ഇന്നലെ പിടിയിലായവര്‍ നേരത്തെയും കേരളത്തിലേക്ക് സ്പിരിറ്റ് കടത്തിയിട്ടുണ്ടെന്ന് എക്‌സൈസ് സംഘം കണ്ടെത്തിയിട്ടുണ്ട്. രണ്ട് മാസങ്ങള്‍ക്കകം തന്നെ ഈ സംഘം 16 തവണ സ്പിരിറ്റ് കടത്തിയ കാര്യവും വ്യക്തമായിട്ടുണ്ട്. ഒന്നര ലക്ഷം ലിറ്റര്‍ സ്പിരിറ്റ് ഇത്തരത്തില്‍ കടത്തിക്കൊണ്ടു വന്നിട്ടുണ്ടത്രെ. ഇത് കേരളത്തിലേക്ക് കടത്തിക്കൊണ്ടുവരുന്ന സ്പിരിറ്റിന്റെ പത്ത് ശതമാനം പോലുമില്ലെന്ന് എക്‌സൈസ് ഉദ്യോഗസ്ഥര്‍ തന്നെ വ്യക്തമാക്കുന്നുണ്ട്. അന്യസംസ്ഥാനങ്ങളില്‍ നിന്ന് കേരളത്തിലേക്ക് വരുന്ന ചരക്ക് ലോറികളിലും മറ്റും അധികൃതരുടെ കണ്ണുവെട്ടിച്ചാണ് സ്പിരിറ്റ് കടത്ത്. പലതും പിടികൂടാനാവുന്നില്ലെന്നതാണ് യാഥാര്‍ത്ഥ്യം. കടത്തുകാര്‍ തമ്മിലുള്ള പകയില്‍ ഏതെങ്കിലുമൊരു സംഘത്തെ ഒറ്റിക്കൊടുക്കുമ്പോള്‍ മാത്രമാണ് പിടികൂടാനാവുന്നത്. ഇത്തരത്തിലല്ലാതെ കേരളത്തില്‍ മുഴുവന്‍ വാഹനവും പരിശോധിച്ചുള്ള സ്പിരിറ്റ് വേട്ടയ്ക്ക് ഇന്നത്തെ സാഹചര്യത്തില്‍ യാതൊരു സാധ്യതയുമില്ല. ചെങ്ങന്നൂര്‍ തുടങ്ങിയ സ്ഥലങ്ങളില്‍ ഇപ്പോള്‍ തന്നെ സ്പിരിറ്റിന്റെ അനധികൃത വില്‍പ്പന കേന്ദ്രവും ആരംഭിച്ചതായാണ് വിവരം. നേരത്തെ പ്രധാനമായും കള്ളില്‍ ചേര്‍ക്കുന്നതിനാണ് സ്പിരിറ്റ് ഉപയോഗിച്ചിരുന്നത്. കേരളത്തിലെ ചില കള്ളുഷാപ്പുകളില്‍ സ്പിരിറ്റ് ചേര്‍ത്ത് കള്ള് വില്‍ക്കുന്ന കാര്യം അത്ര രഹസ്യമൊന്നുമല്ല.
കേരളത്തിലേക്ക് സ്പിരിറ്റ് വ്യാപകമായി ഒഴുകിയ ഒരു കാലമുണ്ടായിരുന്നു. സ്പിരിറ്റ് കടത്തിന് പിന്നില്‍ വന്‍ ലോബി തന്നെ പ്രവര്‍ത്തിച്ചിരുന്നു. ഇടയ്ക്ക് വെച്ച് പിന്മാറിയ ഇവര്‍ കേരളത്തിലെ ഇപ്പോഴത്തെ സാഹചര്യത്തില്‍ വീണ്ടും തലപൊക്കിത്തുടങ്ങി. സ്പിരിറ്റ് കടത്തില്‍ നിന്ന് പിന്‍വാങ്ങിയപലരും പുതിയ സാഹചര്യം പരമാവധി ചൂഷണം ചെയ്യാനുള്ള തയ്യാറെടുപ്പിലാണ്. വ്യാജമദ്യ ലോബിയുടെ നിര്‍ബ്ബന്ധത്തിനും സമ്മര്‍ദ്ദങ്ങള്‍ക്കും വഴങ്ങിയാണ് പല കടത്തുകാരും ഈ രംഗത്തേക്ക് കടന്നുവരുന്നത്. കേരളത്തിലെ പുതിയ സാഹചര്യത്തില്‍ പല സ്ഥലത്തും വ്യാജമദ്യനിര്‍മ്മാണ കേന്ദ്രങ്ങള്‍ ഉയര്‍ന്നുവരുമോ എന്ന ആശങ്കയും നിലനില്‍ക്കുന്നുണ്ട്.
വ്യാജമദ്യലോബി അടങ്ങിയിരിക്കില്ലെന്നാണ് കേരളത്തിന്റെ പൊതുവെയുള്ള ചരിത്രം. അവര്‍ പുതിയ മാനങ്ങള്‍ തേടുകയും ചെയ്യും. ഇപ്പോള്‍ തന്നെ ഗോവ, പോണ്ടിച്ചേരി, മാഹി എന്നിവിടങ്ങളില്‍ നിന്നാണ് രണ്ടാംനിര മദ്യം കേരളത്തില്‍ എത്തുന്നത്. വ്യാജ ഹോളോഗ്രാം സ്റ്റിക്കറുകള്‍പോലും തിരിച്ചറിയാനാവാത്ത നിലയിലാണ്. മാത്രവുമല്ല വ്യാജമദ്യം വിപണിയിലെത്തിക്കാനാവശ്യമായ സ്റ്റിക്കറുകളും കുപ്പികളും വന്‍തോതില്‍ പലകേന്ദ്രങ്ങളിലും എത്തിയ സൂചനകളുമുണ്ട്. മേല്‍പ്പറഞ്ഞ വസ്തുതകള്‍ തെളിയിക്കുന്നത് ഓണക്കാലത്തെന്നുമാത്രമല്ല, മദ്യനിരോധനത്തിന്റെ മറവില്‍ വരുംകാലത്തും കേരളം വ്യാജമദ്യത്തിന്റെ പിടിയിലമരുമെന്നുതന്നെയാണ്. എക്‌സൈസ് വകുപ്പും സര്‍ക്കാരും ഉണര്‍ന്നു പ്രവര്‍ത്തിക്കുന്നില്ലെങ്കില്‍ കേരളത്തിന്റെ വരുംകാലഭാവി അത്രശോഭനമാകാനിടയില്ല. അതു കൊണ്ട് സര്‍ക്കാര്‍ സംവിധാനങ്ങളാകെ നിദാന്ത ജാഗ്രത പാലിച്ചില്ലെങ്കില്‍ കേരളം വ്യാജമദ്യത്തിന്റെയും സ്പിരിറ്റിന്റെയും പറുദീസയായും മാറും. ദീര്‍ഘ വീക്ഷണത്തോടെയും ജനതാല്‍പ്പര്യവും പൊതുനന്മയും വെച്ചുകൊണ്ടാണ് കേരളത്തില്‍ മദ്യനിരോധനം നടപ്പിലാക്കാന്‍ സംസ്ഥാന സര്‍ക്കാര്‍ തീരുമാനിച്ചിത്. മദ്യം കുടുംബങ്ങളിലും സമൂഹത്തിലും ഉണ്ടാക്കുന്ന വിപത്ത് സാമൂഹ്യ പ്രശ്‌നമായി മാറിക്കൊണ്ടിരിക്കുന്ന സാഹചര്യത്തില്‍ സര്‍ക്കാര്‍ കൈക്കൊണ്ടത് ഉചിതമായ തീരുമാനമാണ്. അത് പൂര്‍ണ്ണാര്‍ത്ഥത്തില്‍ സംരക്ഷിക്കേണ്ടതിന് പകരം സര്‍ക്കാറിനെയും ഭരണ സംവിധാനങ്ങളെയാകെത്തന്നെയും നോക്കുകുത്തിയാക്കി ലാഭം കൊയ്യാനുള്ള അവസരമാക്കി മാറ്റുകയാണ് ചിലര്‍. ജനതാല്‍പ്പര്യമൊന്നും അവര്‍ക്ക് വിഷയമല്ല. മടിശ്ശീല വീര്‍പ്പിക്കല്‍ മാത്രമാണ് അവരുടെ ലക്ഷ്യം. ജനങ്ങളുടെ ആരോഗ്യവും ജീവനും അപകടപ്പെടുത്തി ഏത് കുല്‍സിത മാര്‍ഗ്ഗത്തിലൂടെയും തങ്ങളുടെ ലക്ഷ്യം നേടിയെടുക്കുമെന്ന ഉറച്ചവാശിയിലുമാണ് വ്യാജമദ്യലോബിയും സ്പിരിറ്റ് കടത്തുകാരും. ഇവരെ നിലക്ക് നിര്‍ത്തണം.
