Monday, July 22nd, 2019

സ്പീക്കറുടെ വേദി തകര്‍ത്ത സംഭവം; മന്ത്രി ജലീലിന്റെ മാപ്പപേക്ഷ വിവാദമാവുന്നു

കഴിഞ്ഞദിവസം എടപ്പാളില്‍ അധ്യാപകര്‍ക്ക് നടത്തിയ ഏകദിന ശില്‍പശാലയിലായിരുന്നു മന്ത്രി കെ.ടി. ജലീലിന്റെ മാപ്പപേക്ഷ.

Published On:Jul 4, 2018 | 9:54 am

തിരു: ബാര്‍ കോഴ ആരോപണത്തില്‍പെട്ട കെ.എം. മാണിയുടെ ബജറ്റ് പ്രസംഗം തടയാന്‍ നിയമസഭയില്‍ എല്‍.ഡി.എഫ് നടത്തിയ പ്രതിഷേധത്തില്‍ പങ്കെടുത്തതിന് മാപ്പിരന്ന മന്ത്രി കെ.ടി. ജലീലിന്റെ നടപടി വിവാദമാവുന്നു. പ്രതിഷേധത്തില്‍ പങ്കെടുത്തവരില്‍ കെ.ടി. ജലീല്‍ ഉള്‍പ്പെടെ അഞ്ച് എം.എല്‍.എമാര്‍ക്കെതിരെയാണ് യു.ഡി.എഫ് സര്‍ക്കാര്‍ കേസെടുത്തത്. വി. ശിവന്‍കുട്ടിയുടെ അപേക്ഷയില്‍ കേസ് പിന്‍വലിക്കുന്നത് സര്‍ക്കാര്‍ പരിഗണിക്കുന്നതിനിടെയാണ് മന്ത്രിയുടെ ഏറ്റുപറച്ചില്‍.
ബാര്‍ കോഴ ആരോപണത്തെ അപ്പാടെ തള്ളിപ്പറയാന്‍ ജലീലിന്റെ പ്രസ്താവന യു.ഡി.എഫിന് സഹായകമാവുമോ എന്ന ആശങ്ക സി.പി.എം നേതാക്കള്‍ക്കുണ്ട്. എല്‍.ഡി.എഫിന്റെ ഏറ്റവും വലിയ പോരാട്ടമായി മാറിയ സമരമാണ് അത്. ജലീല്‍ നിലപാട് മാറ്റിയതാവുമെന്നാണ് നേതാക്കളുടെ സംശയം.
അധ്യാപകനായതിന്റെ പേരില്‍ മാപ്പ് പറഞ്ഞുവെന്ന് ജലീല്‍ പറയുമ്പോള്‍ ‘താന്‍ 36 വര്‍ഷം അധ്യാപകനായിരുന്നു’വെന്ന് സി.പി.എം കോഴിക്കോട് ജില്ല സെക്രട്ടേറിയറ്റ് അംഗം കെ.കെ. കുഞ്ഞമ്മത് പറഞ്ഞു. സി.പി.എമ്മും എല്‍.ഡി.എഫും നിലപാട് മാറ്റിപ്പറയാത്ത കാലത്തോളം തങ്ങള്‍ ഒപ്പം നില്‍ക്കുമെന്നും വിഷയങ്ങളില്‍ നിലപാട് പറയാന്‍ നേതൃത്വമുണ്ടെന്നും അദ്ദേഹം പറഞ്ഞു. ജലീലിനെക്കൂടാതെ സി.പി.എം കേന്ദ്ര കമ്മിറ്റി അംഗം ഇ.പി. ജയരാജന്‍, സംസ്ഥാന സമിതിയംഗം വി. ശിവന്‍കുട്ടി, കെ. കുഞ്ഞമ്മത്, സി.പി.ഐ നേതാവ് കെ. അജിത് എന്നിവര്‍ക്കെതിരെയാണ് കേസ്.
കഴിഞ്ഞദിവസം എടപ്പാളില്‍ അധ്യാപകര്‍ക്ക് നടത്തിയ ഏകദിന ശില്‍പശാലയിലായിരുന്നു മന്ത്രി കെ.ടി. ജലീലിന്റെ മാപ്പപേക്ഷ. സ്പീക്കറുടെ വേദി തകര്‍ത്തത് അടക്കമുള്ള സംഭവത്തില്‍ അധ്യാപകനായ താന്‍ പങ്കെടുത്തതില്‍ അധ്യാപകസമൂഹത്തോടും വിദ്യാര്‍ഥികളോടും ആത്മാര്‍ഥമായി മാപ്പ് അപേക്ഷിക്കുന്നുവെന്നാണ് മന്ത്രി പറഞ്ഞത്. ‘അധ്യാപകന്‍ എന്നനിലയില്‍ ഏറ്റവും അധികം ദുഃഖിപ്പിച്ച സംഭവം ആയിരുന്നു അത്. അധ്യാപകനായ ജനപ്രതിനിധിക്ക് എല്ലാറ്റിനും നിയന്ത്രണരേഖയുണ്ട്. അതിനപ്പുറം കടന്നതിലുള്ള പശ്ചാത്താപം മൂലമാണ് ക്ഷമാപണം നടത്തുന്നതെ’ന്നും ജലീല്‍ വ്യക്തമാക്കിയിരുന്നു.

 

LIVE NEWS - ONLINE

  • 1
    48 mins ago

    യൂത്ത് കോണ്‍ഗ്രസ് പിഎസ് സി ഓഫീസ് മാര്‍ച്ചില്‍ സംഘര്‍ഷം

  • 2
    51 mins ago

    യൂണിവേഴ്‌സിറ്റി കോളജ് വധശ്രമക്കേസ്; പ്രതികള്‍ക്കായി തെരച്ചില്‍

  • 3
    1 hour ago

    സ്വര്‍ണ വില 240 രൂപ വര്‍ധിച്ചു

  • 4
    2 hours ago

    കര്‍ണാടക; ഇടപെടാനാവില്ലെന്ന് ആവര്‍ത്തിച്ച് സുപ്രീം കോടതി

  • 5
    3 hours ago

    ശൗചാലയവും ഓവുചാലും വൃത്തിയാക്കാനല്ല എം.പിയായത്: പ്രജ്ഞ സിംഗ് ഠാക്കൂര്‍

  • 6
    3 hours ago

    പീഡനക്കേസ്; എഫ്‌ഐ ആര്‍ റദ്ദാക്കണമെന്നാവശ്യപ്പെട്ട് ബിനോയ് ഹൈക്കോടതിയില്‍

  • 7
    4 hours ago

    ഗള്‍ഫില്‍ മത്സ്യ വില ഉയര്‍ന്നു

  • 8
    4 hours ago

    ഇന്തോനീഷ്യന്‍ ഓപ്പണ്‍; ഫൈനലില്‍ അടി പതറി സിന്ധു

  • 9
    4 hours ago

    വീട്ടമ്മ മരിച്ച നിലയില്‍