SERVICES:

KANNUR

    തലശ്ശേരി : കവര്‍ച്ചാസംഘത്തിലെ രണ്ടുപേര്‍ തലശ്ശേരി പോലീസിന്റെ പിടിയിലായി. തമിഴ്‌നാട് ഡിണ്ടിഗല്‍ കുമ്മനംപെട്ടി സ്വദേശി രമേശ് (25), സേലം ആര്‍ക്കോട് ഊനത്തൂര്‍ വില്ലേജിലെ രാമചന്ദ്രന്‍(35) എന്നിവരെയാണ് തലശ്ശേരി എസ് ഐ സനല്‍കുമാറും സംഘവും പിടികൂടിയത്. ഇന്നലെ രാത്രി റെയില്‍വെ സ്റ്റേഷന്‍ റോഡില്‍ കവര്‍ച്ച നടത്താനുള്ള ആസൂത്രണത്തിനിടെയാണ് ഇരുവരും പിടിക്കപ്പെട്ടത്. കവര്‍ച്ചയ്ക്കാവശ്യമായ കമ്പിപ്പാരയും മറ്റും ഇവരില്‍ നിന്ന് കണ്ടെത്തിയിട്ടുണ്ട്. നിരവധി കവര്‍ച്ചാകേസുകളില്‍ പ്രതികളാണിവര്‍. ജയില്‍ശിക്ഷയും അനുഭവിച്ചിട്ടുണ്ട്. രമേശ് എട്ട് മാസങ്ങള്‍ക്ക് മുമ്പ് ഒറ്റപ്പാലം സബ് ജയിലില്‍ നിന്നും രാമചന്ദ്രന്‍ മൂന്ന് മാസം മുമ്പ് പാലക്കാട് സബ് ജയിലില്‍ നിന്നും ജാമ്യത്തിലിറങ്ങിയതാണ്. നേരത്തെ പട്ടാമ്പിയിലാണ് ഇവര്‍ താമസിച്ചിരുന്നത്. ഇപ്പോള്‍ മാഹിയിലാണ് താമസം. മലമ്പുഴ, ഒറ്റപ്പാലം, പാലക്കാട്, പുത്തൂര്‍, മലപ്പുറം പോലീസ് സ്റ്റേഷന്‍ പരിധികളിലെ നിരവധി ക്ഷേത്രങ്ങളിലെ ഭണ്ഡാരം കുത്തിത്തുറന്ന് പണവും പാത്രങ്ങളും മോഷണം നടത്തിയ കേസുകളിലും ഇവര്‍ പ്രതികളാണ്. ഒട്ടേറെ വ്യാപാരസ്ഥാപനങ്ങളിലും ഇവര്‍ കവര്‍ച്ച നടത്തിയിട്ടുണ്ട്. എ എസ് ഐ എ കെ വത്സന്‍, സീനിയര്‍ സിവില്‍ പോലീസ് ഓഫീസര്‍ ബിജുലാല്‍, വിനോദ്, മഹേഷ്, സുജേഷ്, രഞ്ചിത്ത്, മനോജ് എന്നിവര്‍ ചേര്‍ന്നാണ് പ്രതികളെ വലയിലാക്കിയത്. പ്രതികളെ ഇന്ന് തലശ്ശേരി ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് മുമ്പാകെ ഹാജരാക്കും

മലിനജലം റോഡില്‍ തള്ളവെ ടാങ്കര്‍ലോറിയും ഡ്രൈവറും പിടിയില്‍

      കണ്ണൂര്‍ : റോഡരികില്‍ ഒഴുക്കിവിടാനായി മലിനജലവുമായെത്തിയ ടാങ്കര്‍ ലോറി പോലീസ് കസ്റ്റഡിയിലെടുത്തു. സ്വാമിമഠം റോഡില്‍ പുലര്‍ച്ചെ മലിനജലവുമായെത്തിയ കെ എല്‍ 64-2463 നമ്പര്‍ മിനി ടാങ്കര്‍ ലോറിയാണ് പോലീസ് പിടികൂടിയത്. ഡ്രൈവര്‍ പാലക്കാട് സ്വദേശി എ സുനില്‍കുമാറി(37)നെ കസ്റ്റഡിയിലെടുത്തു. പോലീസിനെ കണ്ടപ്പോള്‍ രക്ഷപ്പെടാന്‍ ശ്രമിച്ച ഡ്രൈവറേയും വാഹനവും പിന്തുടര്‍ന്ന് പിടികൂടുകയായിരുന്നുവത്രെ. രണ്ടാഴ്ച മുമ്പും പിള്ളയാര്‍ കോവിലിനടുത്ത് സമാനസംഭവമുണ്ടായിരുന്നു. കാലത്ത് കട തുറക്കാനെത്തിയവര്‍ റോഡ് മുഴുവന്‍ മനുഷ്യ വിസര്‍ജ്യമുള്‍പ്പെടെയുള്ള മലിനജലം ഒഴുകി നടക്കുന്നതാണ് കണ്ടത്. മുനിസിപ്പാലിറ്റി അധികൃതരെ വിവരമറിയിച്ചതിനെ തുടര്‍ന്ന് അവരെത്തിയാണ് പരിഹാരമുണ്ടാക്കിയത്. അതുപോലെ വീണ്ടും റോഡരികില്‍ മലിനജലം ഒഴുക്കി രക്ഷപ്പെടാനായിരുന്നുവത്രെ ഇവരുടെ ലക്ഷ്യം. ചെറിയ മഴയുണ്ടായിരുന്നെങ്കില്‍ ആ വെള്ളത്തോടൊപ്പം റോഡില്‍ ഒഴുക്കിവിടാനായിരുന്നുവത്രെ ഇവരുടെ ഉദ്ദേശം. എന്നാല്‍ മഴപെയ്യാഞ്ഞത് കാരണം ഇവരുടെ പദ്ധതി പൊളിയുകയായിരുന്നുവെന്ന് പരിസരവാസികള്‍ പറഞ്ഞു. വന്‍കിട ഹോട്ടലുകളില്‍ നിന്നും ഫഌറ്റുകളില്‍ നിന്നും കരാര്‍ അടിസ്ഥാനത്തില്‍ മാലിന്യം നീക്കം ചെയ്യുന്ന സംഘമാണോ ഇവരെന്ന് പോലീസ് അന്വേഷിച്ചുവരികയാണ്.  

കെ പി പി നമ്പ്യാര്‍ക്ക് കെല്‍ട്രോണില്‍ അന്ത്യവിശ്രമം
വയറിളക്കം മാറ്റാന്‍ തിളപ്പിച്ചാറ്റിയ വെള്ളം
കടിച്ച കുറുക്കനെ നിലത്തടിച്ചുകൊന്നു
മുഖ്യമന്ത്രി അഴിമതിയുടെ രാജാവ്: എം വി ജയരാജന്‍

        കണ്ണൂര്‍ : അഴിമതിയുടെ കുംഭമേളകളുടെ കുംഭമേളയാണ് കേരളത്തില്‍ നടക്കുന്നതെന്ന് സി പി എം സംസ്ഥാന കമ്മിറ്റി അംഗം എം വി ജയരാജന്‍ ആരോപിച്ചു. ബാര്‍ കോഴക്കേസ് അട്ടിമറിച്ചതില്‍ പ്രതിഷേധിച്ച് ഡി വൈ എഫ് ഐയുടെ നേതൃത്വത്തില്‍ എസ് പി ഓഫീസ് പടിക്കല്‍ നടത്തിയ ധര്‍ണ ഉദ്ഘാടനം ചെയ്ത് സംസാരിക്കുകയായിരുന്നു ജയരാജന്‍. അഴിമതി പണം കൊണ്ട് നേടിയ വിജയമാണ് അരുവിക്കരയിലേത്. ഈ വിജയത്തില്‍ കോണ്‍ഗ്രസ് മത്ത് പിടിച്ചിരിക്കുകയാണ്. എന്നാല്‍ അരുവിക്കരയിലെ വിജയം ഇനിയും കക്കാനുള്ള ലൈസന്‍സായി കാണരുതെന്നും ജയരാജന്‍ മുന്നറിയിപ്പ് നല്‍കി. കേരള സംസ്ഥാന ഭരണത്തില്‍ ഇതുവരെ ഇത്രയും അഴിമതി നിറഞ്ഞ മന്ത്രിമാരുള്ള ഭരണമുണ്ടായിട്ടില്ല. അഴിമതിയുടെ രാജാവായി മുഖ്യമന്ത്രി മാറിയിരിക്കുകയാണ്. വിലക്കയറ്റം പിടിച്ചുനിര്‍ത്തും, നിയമന നിരോധനം പിന്‍വലിക്കും തുടങ്ങിയ മോഹന വാഗ്ദാനങ്ങള്‍ നല്‍കി അധികാരത്തില്‍ വന്ന ഉമ്മന്‍ചാണ്ടി സര്‍ക്കാര്‍ നാല് വര്‍ഷം കൊണ്ട് ഒരാള്‍ക്കെങ്കിലും ജോലി നല്‍കിയോ? സ്‌കൂളുകളില്‍ പാഠപുസ്തകത്തിന് പകരം ആഴ്ചപ്പതിപ്പ് കാണിച്ചാണ് അധ്യാപകര്‍ കുട്ടികളെ പഠിപ്പിക്കുന്നത്. ആഴ്ചപ്പതിപ്പ് നോക്കിയാല്‍ അതിനുള്ളില്‍ മുഴുവന്‍ സരിതയുടെ ചിത്രങ്ങളായിരിക്കും. കുട്ടികളെ പഠിപ്പിക്കുന്നതാകട്ടെ സരിതാ പുരാണവും. അദ്ദേഹം പരിഹസിച്ചു. തിരുവനന്തപുരത്ത് കോണ്‍ഗ്രസ് നേതാക്കള്‍ ഒത്തുകൂടി ആസൂത്രണം ചെയ്തതാണ് ചാനല്‍ ലേഖകനായ നികേഷിന് നേരെയുണ്ടായ ആക്രമണം. ബാര്‍ കോഴക്കേസില്‍ തനിക്ക് മേല്‍ സമ്മര്‍ദ്ദമുണ്ടായെന്ന് ആഭ്യന്തരമന്ത്രി സമ്മതിച്ചതാണ്. സമ്മര്‍ദ്ദമുണ്ടായത് അഴിമതി നടത്തിയ മന്ത്രിമാരെ രക്ഷപ്പെടുത്തുന്നതിനാവശ്യപ്പെട്ടായിരുന്നുവെന്നും നിയമോപദേശം നല്‍കിയവരുടെ ഫോണ്‍ കോള്‍ പരിശോധിച്ചാല്‍ തെളിവ് കിട്ടുമെന്നും ജയരാജന്‍ പറഞ്ഞു. ബിജു കണ്ടക്കൈ, കെ വി സുമേഷ്, പി സന്തോഷ്, എം രതീഷ്, എം വി രാജീവന്‍ എന്നിവര്‍ സംസാരിച്ചു.  

താമര വിരിയുന്നു
ഹാട്രിക് തികച്ച് അജയ്യനായി ഉമ്മന്‍ ചാണ്ടി
പ്രതിരോധ പ്രവര്‍ത്തനങ്ങള്‍ പരാജയം; മലയോരമേഖലയില്‍ ആശങ്ക
കൂത്തുപറമ്പില്‍ ആയുധങ്ങള്‍ക്കും ബോംബുകള്‍ക്കുമായി തെരച്ചില്‍

      കണ്ണൂര്‍ : ബോംബുകളും ആയുധങ്ങളും കണ്ടെത്താന്‍ പോലീസ് റെയ്ഡ് ശക്തമാക്കി. കൂത്തുപറമ്പ് സര്‍ക്കിള്‍ പരിധിയില്‍ വരുന്ന പാലാപ്പറമ്പ്, മാങ്ങാട്ടിടം, കിണറ്റിന്റവിട, ആമ്പിലാട് തുടങ്ങിയ സ്ഥലങ്ങളിലാണ് ഇന്ന് കാലത്ത് മുതല്‍ റെയ്ഡ് തുടങ്ങിയത്. കണ്ണൂര്‍ എ ആര്‍ കമാണ്ടന്റ് ഷാഹുല്‍, കൂത്തുപറമ്പ് അഡീഷണല്‍ എസ് ഐ നാരായണന്‍, പ്രൊബേഷണല്‍ എസ് ഐ വി ജോഷി എന്നിവരുടെ നേതൃത്വത്തിലാണ് റെയ്ഡ് തുടരുന്നത്. കണ്ണൂരില്‍ നിന്നെത്തിയ ബോംബ് സ്‌ക്വാഡും ഡോഗ് സ്‌ക്വാഡും റെയ്ഡില്‍ പങ്കെടുക്കുന്നുണ്ട്. സംഘര്‍ഷം വ്യാപകമാവുന്ന പശ്ചാത്തലത്തിലാണ് പോലീസ് റെയ്ഡ് ശക്തമാക്കിയത്. കഴിഞ്ഞ ദിവസങ്ങളില്‍ ആയിത്തറയില്‍ നടത്തിയ റെയ്ഡില്‍ ഉഗ്രശേഷിയുള്ള നാടന്‍ ബോംബും ഒരു സ്റ്റീല്‍ ബോംബും കണ്ടെത്തിയിരുന്നു. ആമ്പിലാട് കണറ്റിന്റവിട ഭാഗത് രാത്രികാലത്ത് സ്ഥിരമായി ഉണ്ടാകുന്ന ബോംബ് സ്‌ഫോടനങ്ങള്‍ പ്രദേശവാസികളില്‍ പരിഭ്രാന്തിയുളവാക്കിയിരുന്നു. കിണറ്റിന്റവിട വെച്ച് നേരത്തെ പോലീസിന് നേരെ ബോംബെറിഞ്ഞ സംഭവമുണ്ടായിരുന്നു. കൂത്തുപറമ്പിന്റെ പല ഭാഗങ്ങളിലും രാത്രികാലത്ത് ബോംബ് സ്‌ഫോടനം പതിവായിരിക്കുന്നു. ഏറ്റവും ഒടുവിലായി പാനൂര്‍ ചെറ്റക്കണ്ടിയില്‍ ബോംബ് സ്‌ഫോടനത്തില്‍ രണ്ട് പേര്‍ മരണപ്പെടാനിടയാക്കിയതിനെ തുടര്‍ന്നാണ് കൂത്തുപറമ്പിലും ഒപ്പം പാനൂരിന്റെ വിവിധ പ്രദേശങ്ങളിലും പോലീസ് റെയ്ഡ് ശക്തമാക്കിയത്. വരും ദിവസങ്ങളിലും റെയ്ഡ് തുടരാന്‍ തന്നെയാണ് പോലീസിന്റെ തീരുമാനം. തെരച്ചിലില്‍ ആയുധങ്ങളും ബോംബുകളും കണ്ടെത്തിയിട്ടില്ലെങ്കിലും ജനങ്ങളിലുണ്ടാകുന്ന ഭീതി ഒരു പരിധിവരെ അകറ്റാന്‍ റെയ്ഡുകള്‍ കൊണ്ട് സാധിക്കുന്നുണ്ട്.  

ലഹരിവിരുദ്ധ ദിനത്തില്‍ പ്രതിജ്ഞ : കണ്ണൂരില്‍ തൃണമൂല്‍, മമത യഥേഷ്ടം

    കണ്ണൂര്‍ : ലോക ലഹരി വിരുദ്ധ ദിനം ഇന്ന് കൊണ്ടാടുമ്പോള്‍ അന്യസംസ്ഥാന തൊഴിലാളികള്‍ക്കിടയില്‍ ലഹരി-മയക്ക് മരുന്ന് വസ്തുക്കളുടെ ഉപയോഗവും വില്‍പ്പനയും വ്യാപകമാകുന്നു. ഡല്‍ഹി, യു പി, ഒഡീഷ, ബംഗാള്‍, ബീഹാര്‍, രാജസ്ഥാന്‍, ജാര്‍ഖണ്ഡ് എന്നീ സംസ്ഥാനങ്ങളില്‍ നിന്നുമാണ് കേരളത്തില്‍ നിരോധിച്ച ലഹരി വസ്തുക്കള്‍ യഥേഷ്ടം ജില്ലയിലെ വിവിധ മേഖലകളിലേക്ക് ഒഴുകുന്നത്. പതിനായിരക്കണക്കിന് അന്യസംസ്ഥാന തൊഴിലാളികളാണ് ജില്ലയിലുള്ളത്. ഏജന്റുമാര്‍ മുഖേനയും അല്ലാതെയും ജോലി സ്ഥലങ്ങളിലേക്ക് ലഹരി വസ്തുക്കള്‍ എത്തിക്കുന്നു. ടൗണുകളിലെ കടകളില്‍ പോലീസിനെ ഭയന്ന് ഉള്‍നാടന്‍ പ്രദേശങ്ങളിലെ കടകളിലാണ് ലഹരി വസ്തുക്കള്‍ വ്യാപകമായി വില്‍പ്പന നടത്തുന്നത്. മധുരപലഹാരം പോലെയാണ് ലഹരി വസ്തുക്കള്‍ ഉപയോഗിക്കുന്നത്. തൃണമൂല്‍, മമത തുടങ്ങിയ കോഡുകളിലാണ് ലഹരി വസ്തുക്കള്‍ ഇവര്‍ വില്‍പ്പന നടത്തുന്നതും വാങ്ങുന്നതും. അന്താരാഷ്ട്ര മയക്ക്മരുന്ന് വിരുദ്ധ ദിനാചരണത്തിന്റെ ഭാഗമായി ഇന്ന് വിദ്യാഭ്യാസ സ്ഥാപനങ്ങളില്‍ അധ്യാപകരും വിദ്യാര്‍ത്ഥികളും ലഹരിവിരുദ്ധ പ്രതിജ്ഞയെടുത്തു. സ്‌കൂളുകളില്‍ ലഹരിവിരുദ്ധ പരാതിപ്പെട്ടികളും സ്ഥാപിച്ചിട്ടുണ്ട്. ലഹരി വസ്തുക്കളുടെ ഉപയോഗം വിദ്യാര്‍ത്ഥികള്‍ക്കിടയില്‍ കൂടിവരുന്ന സാഹചര്യത്തില്‍ ഉറവിടത്തെകുറിച്ച് സഹായകരമായ വിവരങ്ങള്‍ സ്‌കൂളില്‍ നിന്ന് തന്നെ പോലീസ്-എക്‌സൈസ് വകുപ്പിന് ലഭ്യമാക്കുകയെന്നതാണ് ലക്ഷ്യം. ലഹരിവിരുദ്ധ ബോധവല്‍കരണവും പലയിടത്തും നടന്നു. ജീവിതം തന്നെയാണ് ലഹരിയെന്നും ഓരോ വ്യക്തിയിലും ജീവിതം ആസ്വദിക്കാനുള്ള ഘടകങ്ങളുണ്ടെന്നും മറ്റ് ലഹരി വസ്തുക്കളെ തേടേണ്ടതില്ലെന്നുള്ള സന്ദേശവും ഫെയ്‌സ് ബുക്ക് പേജ് നല്‍കുന്നുണ്ട്. 2014 ആഗസ് 6ന് തുടങ്ങിയ ഫെയ്‌സ് ബുക്ക് പേജില്‍ ഒരുമാസത്തിനകം തന്നെ വിവിധ രാജ്യങ്ങളില്‍ നിന്നായി ലക്ഷക്കണക്കിന് ലൈക്കുകള്‍ കിട്ടിയിരുന്നു. മമ്മൂട്ടി അംബാസിഡറായ കാമ്പയിന്റെ ജീവിതമാണ് ലഹരി ലോഗോ മറ്റ് പല പ്രമുഖ വ്യക്തികളും പ്രൊഫൈല്‍ ചിത്രമായും കവര്‍ ഫോട്ടോയായും ഏറ്റെടുത്തിരുന്നു. എന്നാല്‍ ലഹരി തേടിയുള്ള ചില യുവാക്കളുടെ ഓട്ടത്തിന് വേഗം കൂടുകയാണത്രെ. ലഹരി ലഭിക്കുന്ന പദാര്‍ത്ഥങ്ങള്‍ കണ്ടെത്തി ഉപയോഗിക്കാനാണ് വിദ്യാര്‍ത്ഥികളില്‍ ചിലര്‍ പോലും ഇന്ന് ഏറെ സമയം ചെലവഴിക്കുന്നത്. കൗമാര പ്രായത്തില്‍ രസത്തിന് നുകരുന്ന ലഹരി പിന്നീട് മാറ്റാന്‍ കഴയാത്തസ്ഥിതിയാണ്. സിഗരറ്റ്, പുകയില ഉല്‍പ്പന്നങ്ങള്‍ എന്നിവയില്‍ തുടങ്ങുന്ന ലഹരി പ്രയോഗം കാലക്രമേണ വീര്യം കൂടിയതിലേക്ക് ചേക്കേറുന്നു. കഞ്ചാവ് പോലുള്ള ലഹരി ഉല്‍പ്പന്നങ്ങളുടെ ഉപയോഗം ഒരു ട്രെന്‍ഡ് ആയാണ് ‘ന്യുജന്‍’ കാണുന്നതത്രെ. കഞ്ചാവിന്റെ പുക നിറയുന്ന ഡിജെ പാര്‍ട്ടികളും തലക്ക് വെളിവില്ലാതെ ആടിത്തിമര്‍ക്കുന്ന സ്‌മോക്ക് പാര്‍ട്ടികളുമാണ് യുവാക്കളുടെ വിനോദം. ഡിജെ പാര്‍ട്ടികള്‍ ആസ്വദിക്കാന്‍ വേണ്ടി മാത്രം കഞ്ചാവിന്റെ ഉപയോഗം തുടങ്ങിയവരും നിരവധിയാണ്. കുട്ടികളാകട്ടെ ഗുളിക, വൈറ്റ്‌നര്‍, പശ എന്നിങ്ങനെയുള്ള സാധനങ്ങള്‍ക്ക് പുറകെയും പായുകയാണ്. ഗോവ. മംഗ്ലലുരു, ബംഗലുരു എന്നിവിടങ്ങളില്‍ നിന്ന് കേരളത്തിലേക്ക് വന്‍ തോതില്‍ മയക്ക്മരുന്ന് ഒഴുകുന്നുണ്ടെന്ന് പോലീസ് കണ്ടെത്തിയിരുന്നു. യുവാക്കളേയും വിദ്യാര്‍ത്ഥികളേയും ലക്ഷ്യമിട്ടാണ് അന്യസംസ്ഥാനങ്ങളില്‍ നിന്നുള്ള സംഘങ്ങള്‍ ലഹരി ഉല്‍പ്പന്നങ്ങള്‍ എത്തിക്കുന്നത്. ലഹരി ഉല്‍പ്പന്നങ്ങളുടെ ഒഴുക്ക് തടയാന്‍ പോലീസിന് കഴിയുന്നില്ല. നിരവധി പേരാണ് ലഹരി വസ്തുക്കളുമായി പോലീസിന്റെയും എക്‌സൈസിന്റെയും പിടിയിലാകുന്നത്. ഇതില്‍ ഏറെയും ചെറുപ്പക്കാരാണ്. ലഹരി ഉപയോഗം കൂടുതലും വിദ്യാര്‍ത്ഥികളിലാണ്. രക്ഷിതാക്കളെ ഇത് ആശങ്കയിലാക്കുന്നുണ്ട്. സ്‌കൂള്‍-കോളേജ് തുറന്നതോടെ ആശങ്കയുടെ ആക്കം വര്‍ധിച്ചു. കഞ്ചാവ് എത്തിക്കുന്നവരും ഇടനിലക്കാരുമായ വമ്പന്‍ സ്രാവുകള്‍ ഇന്നും വിലസുകയാണ്. ഇവരെ പിടികൂടാന്‍ അധികൃതര്‍ ഇരുട്ടില്‍ തപ്പുകയാണത്രെ. മദ്യവും

ഡി വൈ എഫ് ഐ പ്രവര്‍ത്തകന് മര്‍ദനം; ഹര്‍ത്താല്‍

        കണ്ണൂര്‍: മട്ടന്നൂര്‍ നടുവനാട്ട് ഡി വൈ എഫ് ഐ പ്രവര്‍ത്തകന്‍ ഇ വിജേഷി(29)നെ മര്‍ദനമേറ്റ പരിക്കുകളോടെ ഇരിട്ടി താലൂക്കാശുപത്രിയില്‍ പ്രവേശിപ്പിച്ചു. ഇന്നലെ രാത്രി വീട്ടിലേക്ക് നടന്നുപോകവെ കൊട്ടൂര്‍ ഞാലില്‍ വെച്ച് ആര്‍ എസ് എസ് പ്രവര്‍ത്തകര്‍ അക്രമിക്കുകയായിരുന്നുവെന്ന് സി പി എം ആരോപിച്ചു. വിജേഷിന്റെ വീടിന്റെ ചുമര്‍ ഇന്ന് പുലര്‍ച്ചെ കരിഓയില്‍ ഒഴിച്ച് വികൃതമാക്കുകയും കിണര്‍ കരിഓയില്‍ ഒഴിച്ച് മലിനമാക്കുകയും ചെയ്തനിലയിലാണ്. സംഭവത്തില്‍ പ്രതിഷേധിച്ച് സി പി എം ആഹ്വാനപ്രകാരം നടുവനാട് സി പി എം ഹര്‍ത്താല്‍ ആചരിച്ച് വരുന്നു. സംഘര്‍ഷസാധ്യത കണക്കിലെടുത്ത് മട്ടന്നൂര്‍ പോലീസിന്റേയും ബോംബ് സ്‌ക്വാഡിന്റെയും നേതൃത്വത്തില്‍ വിവിധ പ്രദേശങ്ങളില്‍ റെയ്ഡ് തുടരുന്നു.    

മന്ത്രിക്കെതിരെ കരിങ്കൊടി; ഡി ഐ ജി റിപ്പോര്‍ട്ട് തേടി

        കണ്ണൂര്‍: ഇന്നലെ കണ്ണൂരില്‍ പട്ടയമേളക്കെത്തിയ മന്ത്രി അടൂര്‍ പ്രകാശിന് നേരെ ഡി വൈ എഫ് ഐ പ്രവര്‍ത്തകര്‍ കരിങ്കൊടി കാണിച്ച സംഭവത്തില്‍ ജില്ലാ പോലീസ് മേധാവിയോട് ഡി ഐ ജി റിപ്പോര്‍ട്ട് തേടി. സുരക്ഷാവീഴ്ചയുടെ കാരണങ്ങള്‍ ഉടന്‍ ബോധ്യപ്പെടുത്തണമെന്നാണ് നിര്‍ദ്ദേശം. ഇതുമായി ബന്ധപ്പെട്ട് കണ്ണൂര്‍ ടൗണ്‍ പോലീസിലെ ചിലര്‍ക്കെതിരെ നടപടിക്കും സാധ്യതയുണ്ട്. ഇന്നലെ കാലത്ത് 11 മണിക്ക് കണ്ണൂര്‍ നവനീതം ഓഡിറ്റോറിയത്തിലാണ് മന്ത്രിക്ക് നേരെ കരിങ്കൊടി കാട്ടിയത്. പട്ടയമേളയുടെ ഉദ്ഘാടനത്തിനെത്തിയ മന്ത്രി അടൂര്‍ പ്രകാശിനെ പ്രസംഗിക്കാന്‍ അനുവദിക്കാതെ കരിങ്കൊടിയുമായി എത്തിയ പത്ത് ഡി വൈ എഫ് ഐ പ്രവര്‍ത്തകര്‍ ഗോ ബാക്ക് വിളിച്ച് തടയുകയായിരുന്നു. സരിത കേസ് ഒതുക്കാന്‍ മന്ത്രി അടൂര്‍ പ്രകാശ് 30 ലക്ഷം രൂപ കൊടുത്തുവെന്ന ആരോപണം ഒരു ചാനല്‍ പുറത്തു വിട്ടതിന്റെ പശ്ചാത്തലത്തിലായിരുന്നു പ്രതിഷേധം. മന്ത്രി പങ്കെടുക്കുന്ന പരിപാടിയായിട്ടും ആവശ്യത്തിന് പോലീസുകാരെ നിയോഗിച്ച് സുരക്ഷ ഒരുക്കുന്നതില്‍ പോലീസ് പരാജയപ്പെട്ടുവെന്നാണ് ആഭ്യന്തരവകുപ്പ് വിലയിരുത്തുന്നത്. വെല്‍ഫെയര്‍ പാര്‍ട്ടി പ്രവര്‍ത്തകര്‍ മന്ത്രിയെ കരിങ്കൊടി കാട്ടുമെന്ന് ഇന്റലിജന്‍സ് റിപ്പോര്‍ട്ട് ചെയ്തിരുന്നു. ഈ സാഹചര്യത്തിലും മന്ത്രിയെ സംരക്ഷിക്കാന്‍ ആവശ്യത്തിന് പോലീസുകാര്‍ ഇന്നലെ കണ്ണൂരില്‍ ഉണ്ടായിരുന്നില്ല. പരിപാടി തുടങ്ങുമ്പോള്‍ നൂറുകണക്കിന് ആളുകള്‍ ഓഡിറ്റോറിയത്തില്‍ എത്തിയിരുന്നു. എന്നാല്‍ രണ്ട് പോലീസുകാര്‍ മാത്രമാണ് സുരക്ഷാ ഡ്യൂട്ടിക്ക് ഈ സമയം ഉണ്ടായിരുന്നത്. പുറത്ത് മന്ത്രിയുടെ എസ്‌കോര്‍ട്ടും പോലീസും ഉണ്ടായിരുന്നു. എന്നാല്‍ അപ്രതീക്ഷിതമായുണ്ടായ പ്രതിഷേധം നേരിടാന്‍ ഇവര്‍ക്കും സാധിച്ചില്ല. ഡി വൈ എഫ് ഐ ജില്ലാ പ്രസിഡണ്ട് ബിജു കണ്ടക്കൈയുടെ നേതൃത്വത്തില്‍ പത്തുപേരാണ് മുദ്രാവാക്യം വിളിയുമായി ഹാളിലേക്ക് ഇരച്ചുകയറിയത്. പൊടുന്നനെയുണ്ടായ പ്രതിഷേധത്തില്‍ പരിപാടിക്കെത്തിയവരും കാര്യമറിയാതെ പരിഭ്രാന്തിയിലായി. സ്ത്രീകള്‍ നിലവിളിച്ചു. ഇതിനിടയില്‍ സ്ഥലത്തുണ്ടായിരുന്ന പോലീസുകാരും ഡി വൈ എഫ് ഐ പ്രവര്‍ത്തകരും തമ്മില്‍ പിടിവലി നടന്നിരുന്നു. തുടര്‍ന്നാണ് കണ്ണൂര്‍ സി ഐ എം പി ആസാദ് സ്ഥലത്തെത്തിയത്.  

DISTRICT NEWS
MORE NEWS

© Copyright 2013 Sudinam. All rights reserved.