ആലപ്പുഴ: സെക്രട്ടേറിയറ്റ് ഉപരോധം അവസാനിപ്പിച്ചത് ജന പിന്തുണ നഷ്ടപ്പെടാതിരിക്കാനെന്ന് സി പി എം സംസ്ഥാന സിക്രട്ടറി പിണറായി വിജയന്‍. അതിനാലാണ് ജുഢീഷ്യല്‍ അന്വേഷണം നടത്താനുള്ള മുഖ്യമന്ത്രിയുടെ ഓഫര്‍ സ്വീകരിച്ചതെന്നും അദ്ദേഹം പറഞ്ഞു. പി കൃഷ്ണപ്പിള്ള ദിനാചരണത്തോടനുബന്ധിച്ച് നടന്ന ചടങ്ങില്‍ സംസാരിക്കുകയായിരുന്നു അദ്ദേഹം. ജുഡീഷ്യല്‍ അന്വേഷണം പ്രഖ്യാപിച്ചിട്ടും ഉപരോധം അവസാനിപ്പിച്ചില്ലെങ്കില്‍ അത് സമരത്തിന് ലഭിച്ച ജനപിന്തുണ കുറയ്ക്കുമായിരുന്നു. ഇനി മുതല്‍ പ്രക്ഷോഭം മുഖ്യമന്ത്രിയില്‍ കേന്ദ്രീകരിക്കും. ബഹിഷ്‌കരണവും കരിങ്കൊടി കാണിക്കലും തുടരും. ഉപരോധ സമരം പിന്‍വലിച്ചപ്പോള്‍ ചിലര്‍ക്ക് നിരാശ ഉണ്ടായിട്ടുണ്ട്. അവര്‍ പ്രതീക്ഷിച്ചതു പോലുള്ള ചില ദൃശ്യങ്ങള്‍ ലഭിക്കാത്തതിനാലാണത്. പ്രതിപക്ഷം നടത്തിയ ഐതിഹാസിക സമരത്തെ കുറിച്ച് ബി.ജെ.പി നടത്തുന്ന അഭിപ്രായ പ്രകടനങ്ങളില്‍ അത്ഭുതം തോന്നുന്നു. വോട്ടുകച്ചവടം നടത്തുന്ന ഒരു പാര്‍ട്ടിക്ക് അതിനുള്ള അവകാശമുണ്ടോയെന്ന് ചിന്തിക്കണമെന്നും പിണറായി പറഞ്ഞു.
സോളാര്‍ തട്ടിപ്പില്‍ മുഖ്യമന്ത്രിയും അദ്ദേഹത്തിന്റെ ഓഫീസും കൂട്ടുനിന്നിട്ടുണ്ട്. അതിനാല്‍ മുഖ്യമന്ത്രി രാജിവെച്ച് അന്വേഷണം നേരിടണം. മുഖ്യമന്ത്രി രാജിവയ്ക്കണമെന്ന നിലപാടില്‍ മാറ്റമില്ല. ഈ ആവശ്യം നേടിയെടുക്കുന്നത് വരെ സമരം തുടരുമെന്നും പിണറായി കൂട്ടിച്ചേര്‍ത്തു.