ആലപ്പുഴ: ആലപ്പുഴ നഗരസഭയുടെ ബീച്ച് വിജയ്പാര്‍ക്കിന് ഒടുവില്‍ ശാപമോക്ഷം. പുതി മോടിയില്‍ പാര്‍ക്ക് നവീകരിച്ച് സന്ദര്‍ശകരെ ആകര്‍ഷിക്കാനാണ് അധികൃതരുടെ നീക്കം. ആലപ്പുഴയില്‍ കേന്ദ്ര സര്‍ക്കാര്‍ സഹായത്തോടെ നടപ്പാക്കുന്ന ടൂറിസം മെഗാ സര്‍ക്യൂട്ട് പദ്ധതിയുടെ ഭാഗമായി 56 ലക്ഷം രൂപയുടെ നവീകരണ പ്രവര്‍ത്തനങ്ങളാണ് നടന്നുകൊണ്ടിരിക്കുന്നത്. ഇതുകൂടാതെ ഡി.ടി.പി.സി. പത്തുലക്ഷം രൂപ മുടക്കി കുട്ടികള്‍ക്കായി പുതിയ കളി ഉപകരണങ്ങളും എത്തിച്ചിട്ടുണ്ട്. ഇവയുടെ സ്ഥാപിക്കലും ചുറ്റുമതില്‍ നിര്‍മാണവുമാണ് പുരോഗമിക്കുന്നത്.
ത്രിമാന ചിത്രങ്ങളുടെ ഗണത്തില്‍പെട്ട 5 ഡി ചിത്രങ്ങള്‍ പ്രദര്‍ശിപ്പിക്കുന്നതിനുള്ള 5 ഡി തിയറ്ററും പാര്‍ക്കില്‍ സ്ഥാപിക്കുന്നുണ്ട്. കളിപ്പാട്ട തീവണ്ടിയും ഇനി മുതല്‍ ഉണ്ടാകും. ബംഗളുരുവിലെ സ്വകാര്യ സ്ഥാപനങ്ങളാണ് തീവണ്ടിയുടെയും 5 ഡി തിയേറ്ററിന്റെയും നടത്തിപ്പും അറ്റകുറ്റപ്പണികളും നടത്തുക. ഇത് സംബന്ധിച്ച കരാര്‍ ഡി.ടി.പി.സിയും കമ്പിനിയും ഒപ്പുവച്ചു. കമ്പനി സ്വന്തം ചെലവിലാകും തീവണ്ടിയും തിയറ്ററും പാര്‍ക്കില്‍ സ്ഥാപിക്കുന്നത്. ഇവയില്‍ കയറുന്നതിനുള്ള പ്രവേശന ഫീസ് ഡി.ടി.പി.സി നിശ്ചയിക്കുകയും ഈ തുക കമ്പനികള്‍ക്ക് വാങ്ങാന്‍ കഴിയുന്ന തരത്തിലുള്ളതാണ് കരാര്‍.
സംസ്ഥാനത്തെ തന്നെ ആദ്യ 5ഡി തിയേറ്ററും ഒരേ സമയം 15 കുട്ടികള്‍ക്ക് ഗെയിം ഷോ കാണാന്‍ അവസരമുണ്ടാകും. 20 മിനിട്ടാണ് ഒരു ഷോയുടെ ദൈര്‍ഘ്യം. പാര്‍ക്കിന്റെ വടക്കേ അറ്റത്തുള്ള കെട്ടിടത്തിലാണ് 5 ഡി തിയേറ്റര്‍ സ്ഥാപിക്കുന്നത്. പുതിയ കളി ഉപകരണങ്ങള്‍ സ്ഥാപിച്ചു കഴിഞ്ഞാല്‍ പാര്‍ക്കിലേക്കുള്ള പ്രവേശന ഫീസ് ഉയര്‍ത്താനും ഡി.ടി.പി.സി. ആലോചിക്കുന്നുണ്ട്. കുട്ടികള്‍ക്ക് മൂന്ന് രൂപയെന്നത് അഞ്ച് രൂപയാക്കാനും മുതിര്‍ന്നവര്‍ക്ക് അഞ്ചുരൂപയെന്നത് പത്ത് രൂപയാക്കാനുമാണ് നീക്കം.