ശ്രീകണ്ഠാപുരം: 2016 ഓടെ പച്ചക്കറി-പാല്‍ ഉല്‍പാദനത്തില്‍ സ്വയം പര്യാപ്ത കൈവരിക്കാന്‍ വേണ്ട പദ്ധതികള്‍ക്ക് രൂപം നല്‍കുമെന്ന് ഗ്രാമവികസന മന്ത്രി കെ സി ജോസഫ്. ഇതില്‍ കുടുംബശ്രീക്ക് നിര്‍ണ്ണായക പങ്കുണ്ടാവുമെന്നും അദ്ദേഹം പറഞ്ഞു. തരിശ് ഭൂമികള്‍ കൃഷി ചെയ്യാന്‍ കുടുംബശ്രീ ഏറ്റെടുക്കുകയാണെങ്കില്‍ അതിന് ആവശ്യമായ എല്ലാ സഹായങ്ങളും സര്‍ക്കാര്‍ നല്‍കും. ശ്രീകണ്ഠാപുരത്ത് കുടുംബശ്രീ വാര്‍ഷികത്തോടനുബന്ധിച്ച് സംഘടിപ്പിച്ച കാര്‍ഷിക സെമിനാര്‍ ഉദ്ഘാടനം ചെയ്യുകയായിരുന്നു മന്ത്രി. കൃഷിക്ക് ആവശ്യമായ മനുഷ്യാധ്വാനം മഹത്മാ ഗാന്ധി ദേശീയ തൊഴിലുറപ്പ് പദ്ധതിയില്‍ ഉള്‍പ്പെടുത്താന്‍ കഴിയുമെന്നും മന്ത്രി തുടര്‍ന്ന് പറഞ്ഞു. ചടങ്ങില്‍ ബ്ലോക്ക് പഞ്ചായത്ത് പ്രസിഡന്റ് സി എച്ച് മേമി അധ്യക്ഷം വഹിച്ചു. ഡോ. കെ വി ഫിലോമിന, മിനിവര്‍ഗീസ്, മലപ്പട്ടം പ്രഭാകരന്‍, എസ് ബി കുഞ്ഞഹമ്മദ്, വി പി നസീമ, കെ എം പുരുഷോത്തമന്‍, കെ വി ഗീത എന്നിവര്‍ സംസാരിച്ചു. കുടുംബശ്രീ ജില്ലാ കോ-ഓര്‍ഡിനേറ്റര്‍ എം വി പ്രേമരാജന്‍ സ്വാഗതം പറഞ്ഞു. ഉച്ചയ്ക്ക് ശേഷം പച്ചക്കറി കൃഷിയില്‍ ജൈവ കൃഷിയുടെ പ്രാധാന്യം എന്ന വിഷയത്തെക്കുറിച്ച് സെമിനാര്‍ നടന്നു. കെ പി ജയരാജന്‍, ജോര്‍ജ് കുട്ടിമാത്യു എന്നിവര്‍ ക്ലാസെടുത്തു
തകര്‍ന്ന മലേഷ്യന്‍ വിമാനത്തിന്റെ ബ്ലാക്ക് ബോക്‌സ് കൈമാറി
ഡോണെറ്റ്‌സ്‌ക്: യുക്രൈന്‍ മേഖലയില്‍ തകര്‍ന്ന് വീണ മലേഷ്യന്‍ വിമാനത്തിന്റെ ബ്ലാക്ക് ബോക്‌സ് ഉക്രൈനിലെ വിഘടനവാദികള്‍ മലേഷ്യക്ക് കൈമാറി. ഡോണെറ്റ്‌സ്‌കില്‍ മലേഷ്യന്‍ ഉദ്യോഗസ്ഥരുമായുള്ള ചര്‍ച്ചയ്ക്ക് ശേഷമാണ് രണ്ട് ബ്ലാക്ക് ബോക്‌സുകള്‍ കൈമാറിയത്. മാദ്ധ്യമ പ്രവര്‍ത്തകരുടെ സാന്നിദ്ധ്യത്തില്‍ ആയിരുന്നു കൈമാറ്റം. ബ്ലാക്ക് ബോക്‌സിന് കേടുപാട് പറ്റിയില്ലെന്ന് വിദഗ്ദ്ധര്‍ പറഞ്ഞു. ബ്ലാക്ക് ബോക്‌സ് ലഭിച്ചതോടെ വിമാനം തകര്‍ന്നതിന്റെ യഥാര്‍ത്ഥ കാരണം അറിവാകുമെന്നാണ് പ്രതീക്ഷ. അപകടം സംഭവിച്ച സമയം, വിമാനം എത്ര അടി ഉയരത്തില്‍ പറക്കുകയായിരുന്നു, വിമാനത്തിന്റെ കൃത്യമായ സ്ഥാനം, കോക്പിറ്റ് വോയിസ് റെക്കോഡറിലെ സംഭാഷണങ്ങള്‍ എന്നിവ സംബന്ധിച്ച വിവരങ്ങളാണ് ലഭ്യമാവുക. വ്യാഴാഴ്ച ഉണ്ടായ അപകടത്തില്‍ 298 പേരാണ് മരിച്ചത്. ഇരുന്നൂറോളം മൃതദേഹങ്ങള്‍ കണ്ടെടുത്തിട്ടുണ്ട്. അതേസമയം യുക്രൈനില്‍ തകര്‍ന്നുവീണ മലേഷ്യന്‍ വിമാനവുമായി എയര്‍ഇന്ത്യ വിമാനം ബന്ധപ്പെടുവാന്‍ ശ്രമിച്ചിരുന്നതായി പ്രമുഖ മാധ്യമത്തിന്റെ റിപ്പോര്‍ട്ട്. ഡല്‍ഹിയില്‍ നിന്നും ഇംഗ്ലണ്ടിലെ ബിര്‍മിഗ്ഹാമിലേക്ക് പോവുകയായിരുന്ന ഇന്ത്യന്‍ വിമാനമാണ് ബന്ധപ്പെടുവാന്‍ ശ്രമിച്ചതെന്ന് റിപ്പോര്‍ട്ടില്‍ പറയുന്നു. എന്നാല്‍ എയര്‍ ഇന്ത്യ വക്താവ് ഈ വാര്‍ത്തയോട് പ്രതികരിക്കുവാന്‍ വിസമ്മതിച്ചു. എംഎച്ച് 17 എന്ന മലേഷ്യന്‍ വിമാനവുമായി വെറും 25 കിലോമീറ്റര്‍ മാത്രം അകലെയുണ്ടായിരുന്ന എയര്‍ഇന്ത്യ വിമാനം പല തവണ പൈലറ്റുമായി ബന്ധപ്പെടുവാന്‍ ശ്രമിച്ചെങ്കിലും പ്രതികരണമൊന്നും ലഭിച്ചിരുന്നില്ല. യുക്രൈന്‍ വ്യോമ ഗതാഗത നിയന്ത്രണ വിഭാഗത്തിന്റെ നിര്‍ദേശപ്രകാരമായിരുന്നു ഈ ശ്രമം. എന്നാല്‍ പിന്നീട് ദുരന്തവാര്‍ത്ത അറിഞ്ഞ എയര്‍ഇന്ത്യ പൈലറ്റ് അത്ഭുതപ്പെടുകയായിരുന്നുവെന്നും റിപ്പോര്‍ട്ടില്‍ പറയുന്നു
2014 ലെ സംസ്ഥാന ചലച്ചിത്ര അവാര്‍ഡ് റദ്ധാക്കണമെന്നാവശ്യപ്പെട്ട് ഹര്‍ജി
മാനദണ്ഡങ്ങള്‍ ലംഘിച്ചാണ് 2014 ലെ സംസ്ഥാന ചലച്ചിത്ര അവാര്‍ഡ് പ്രഖ്യാപിച്ചതെന്നും അതിനാല്‍ 2014ലെ അവാര്‍ഡുകള്‍ റദ്ദാക്കണമെന്നുമാവശ്യപ്പെട്ട് ഹൈക്കോടതിയില്‍ ഹര്‍ജി. സംവിധായകന്‍ ഡോ. ബിജുവും നിര്‍മാതാവ് അനില്‍ അമ്പലക്കാവുമാണ് ഹര്‍ജിക്കാര്‍. 185 സിനിമകള്‍ സ്‌ക്രീനിങിന് കമ്മിറ്റി മുന്‍പാകെ പരിഗണനക്കുണ്ടായിരുന്നെങ്കിലും 85 എണ്ണം മാത്രമേ സ്‌ക്രീനിങ് കമ്മിറ്റി കണ്ടിട്ടുള്ളൂ. ഹര്‍ജിക്കാരനായ ഡോ. ബിജു ‘പേരറിയാത്തവര്‍’ എന്ന സിനിമയുടെ സംവിധായകനാണ്. ഈ സിനിമ കഴിഞ്ഞവര്‍ഷം ദേശീയ പുരസ്‌കാരം നേടിയിരുന്നു ഹര്‍ജിക്കാര്‍ ചൂണ്ടിക്കാട്ടുന്നു. അവാര്‍ഡ് നിര്‍ണയത്തിനു പ്രത്യേക ചട്ടം ഉണ്ടായിരിക്കെ അതു ലംഘിച്ചാണ് ഇത്തവണ അവാര്‍ഡ് നിര്‍ണയം നടത്തിയതെന്നാണ് ആരോപണം. അവാര്‍ഡ് നിര്‍ണയം പുനഃപരിശോധിക്കാനായി വിദഗ്ധരടങ്ങുന്ന സ്‌ക്രീനിങ് കമ്മിറ്റിയെ നിയമിക്കണമെന്നും ഹര്‍ജിയില്‍ ആവശ്യപ്പെടുന്നു. ഹര്‍ജി പരിഗണിച്ച ജസ്റ്റിസ് മുഹമ്മദ് മുഷ്താഖ് സര്‍ക്കാരിനു നോട്ടീസയക്കാന്‍ ഉത്തരവിട്ടു
ഇശാന്ത് കൊടുങ്കാറ്റായി ; ലോര്‍ഡ്‌സില്‍ ഇന്ത്യ ചരിത്രം കുറിച്ചു
ലണ്ടന്‍: ലോര്‍ഡ്‌സ് ടെസ്റ്റില്‍ ഇന്ത്യക്ക് ചരിത്രവിജയം. 28 വര്‍ഷങ്ങള്‍ക്കിടെയാണ് ലോര്‍ഡ്‌സില്‍ ഇന്ത്യ രണ്ടാമത്തെ വിജയം കുറിച്ചത്. ഏഴു വിക്കറ്റ് നേടിയ ഇശാന്ത് ശര്‍മയാണ് ഇന്ത്യക്ക് ചരിത്ര വിജയം സമ്മാനിച്ചത്. ഇന്ത്യന്‍ പേസ് ബൗളിങ് ചരിത്രത്തില്‍ ഓര്‍ത്തുവെക്കാവുന്ന നിമിഷങ്ങളാണ് ഇംഗ്ലീഷുകാരുടെ മണ്ണില്‍ ഡല്‍ഹിക്കാരന്‍ കാഴ്ചവെച്ചത്. ഇംഗ്ലണ്ടില്‍ ഇന്ത്യന്‍ ബൗളറുടെ ഏറ്റവും മികച്ച പ്രകടനം എഴുതിച്ചേര്‍ത്ത ഇശാന്ത്, കളിയിലെ താരമായും തെരഞ്ഞെടുക്കപ്പെട്ടു. ചായക്കു പിരിയാന്‍ 50 മിനുട്ട് ബാക്കി നില്‍ക്കേ 95 റണ്‍സിന്റെ ഉജ്ജ്വല വിജയം സ്വന്തമാക്കി ഇന്ത്യ അഞ്ചു ടെസ്റ്റ് പരമ്പരയില്‍ 1-0ന് മുന്നിലെത്തി. വിദേശത്തെ പരാജയ പരമ്പരകള്‍ക്കൊടുവില്‍ മൂന്നു വര്‍ഷത്തിനപ്പുറത്തെ കാത്തിരിപ്പുകളാണ് ക്രിക്കറ്റിന്റെ മക്കയില്‍ ഇന്ത്യ അവസാനിപ്പിച്ചത്. നോട്ടിങ്ഹാമില്‍ നടന്ന ഒന്നാം ടെസ്റ്റ് സമനിലയില്‍ കലാശിച്ചിരുന്നു. പരമ്പരയിലെ മൂന്നാം മത്സരം 27ന് സതാംപ്ടണില്‍ നടക്കും. ക്യാപ്റ്റന്‍ അലസ്റ്റര്‍ കുക്കിനെ ഒരിക്കല്‍ കൂടി പ്രതിസ്ഥാനത്തു നിര്‍ത്തുന്നതായി ഇംഗ്ലണ്ടിന്റെ തോല്‍വി. കുക്കിനെ നായക സ്ഥാനത്തു നിന്ന് മാറ്റണമെന്ന് മുന്‍നായകന്‍മാര്‍ നിരന്തരം ആവശ്യപ്പെടുന്ന പശ്ചാത്തലത്തിലാണ് ലോര്‍ഡ്‌സില്‍ ഇംഗ്ലീഷ് നിര തകര്‍ന്നടിഞ്ഞത്. രണ്ടാം ഇന്നിങ്‌സില്‍ ഇന്ത്യ മുന്നോട്ടുവെച്ച 342 റണ്‍സ് പിന്തുടരുമ്പോള്‍ നാലാം ദിവസം നാലിന് 105 എന്ന നിലയിലായിരുന്നു ഇംഗ്ലണ്ട്. ഞായറാഴ്ച രണ്ടു വിക്കറ്റെടുത്ത ഇശാന്ത് അവസാന ദിവസമായ ഇന്നലെ ഫോമിന്റെ കൊടുമുടിയിലായിരുന്നു. ഒന്നാം ഇന്നിങ്‌സില്‍ 24 ഓവര്‍ പന്തെറിഞ്ഞിട്ടും വെറുംകൈയോടെ മടങ്ങേണ്ടി വന്നതിന്റെ പ്രായശ്ചിത്തമായിരുന്നു ഇന്നലെ ഇശാന്തിന്റെ പ്രകടനം. നാലിന് 175 ശക്തമായ നിലയിലേക്ക് ഇംഗ്ലണ്ടിനെ നയിച്ച് മത്സരം വരുതിയിലാക്കാന്‍ ശ്രമിച്ച ജോ റൂട്ട് (66) മുഈന്‍ അലി (39) സഖ്യത്തെ തകര്‍ത്ത് ഇന്ത്യക്ക് ബ്രേക് ത്രൂ നല്‍കിക്കൊണ്ടാണ് ഇശാന്ത് ഇന്നലെ തുടങ്ങിയത്. അലിയെ ചേതേശ്വര്‍ പൂജാരയുടെ കൈകളിലും റൂട്ടിനെ സ്റ്റുവര്‍ട്ട് ബിന്നിയുടെ കൈകളിലുമെത്തിച്ചു. 101 റണ്‍സിന്റെ കൂട്ടുകെട്ടുണ്ടാക്കിയ ശേഷമാണ് ഈ സഖ്യം പിരിഞ്ഞത്. മധ്യനിരയിലെ അടുത്ത മൂന്നു വിക്കറ്റുകളും ഇശാന്തിന്റെ കീശയിലേക്കു തന്നെ. മാറ്റ് പ്രയര്‍ (12), ബെന്‍ സ്‌റ്റോക്‌സ് (പൂജ്യം), സ്റ്റുവര്‍ട്ട് ബ്രോഡ് (എട്ട്) എന്നിവര്‍ക്ക് നിര്‍ണായക ഘട്ടത്തില്‍ ആതിഥേയരുടെ രക്ഷക്കെത്താനായില്ല. തലേന്ന് ക്യാപ്റ്റന്‍ അലസ്റ്റര്‍ കുക്കിനെയും ഇയാന്‍ ബെല്ലിനെയും ഇശാന്ത് മടക്കിയിരുന്നു. മുഹമ്മദ് ശമിയും രവീന്ദ്ര ജഡേജയും ഓരോ വിക്കറ്റ് നേടുകയും അവസാന വിക്കറ്റായി ജെയിംസ് ആന്‍ഡേഴ്‌സണെ ജഡേജ റണ്‍ഔട്ട് ചെയ്യുകയും ചെയ്തതോടെ ഇന്ത്യയുടെ വിജയം അതിമധുരമുള്ളതായി. ഒന്നാം ഇന്നിങ്‌സില്‍ ആന്‍ഡേഴ്‌സന്റെ വിക്കറ്റ് ജഡേജക്കായിരുന്നു. ഒന്നാം ടെസ്റ്റില്‍ ആന്‍ഡേഴ്‌സണ്‍ ജഡേജയെ പിടിച്ച് തള്ളുകയും അസഭ്യം പറയുകയും ചെയ്തതായി ഇന്ത്യ ഐ.സി.സിയില്‍ പരാതിപ്പെട്ടതിനാല്‍ വിവാദ പശ്ചാത്തലത്തിലാണ് രണ്ടാം ടെസ്റ്റ് അരങ്ങേറിയത്. വിദേശത്തെ 16 ടെസ്റ്റുകളില്‍ ഇന്ത്യയുടെ ആദ്യ വിജയമായിരുന്നു ലോര്‍ഡ്‌സില്‍. 2011നു ശേഷം ആദ്യത്തെ വിജയമായിരുന്നു ഇത്.
ഗുരുവായൂരില്‍ കോടിയര്‍ച്ചന
തൃശൂര്‍: നാരായണാലയത്തില്‍ 21ാമത് കോടിയര്‍ച്ചന ബുധനാഴ്ച ആരംഭിക്കുമെന്ന് ഭാരവാഹികള്‍ പത്രസമ്മേളനത്തില്‍ അറിയിച്ചു. പുലര്‍ച്ചെ ഓതിക്കന്‍ മുന്നൂലം നീലകണ്ഠന്‍ നമ്പൂതിരി, മുന്നൂലം സുബ്രഹ്മണ്യന്‍ നമ്പൂതിരി എന്നിവര്‍ നേതൃത്വം നല്‍കുന്ന ഗണപതിഹോമം നടക്കും. ആഞ്ഞം മധുസൂദനന്‍ നമ്പൂതിരി ഗുരുവന്ദനവും മംഗളാരതിയും നടത്തും. തുടര്‍ന്ന് അഭേദാശ്രമത്തിലെ മാതാജി നരഹരപ്രിയ സ്വാമിനിയുടെ നേതൃത്വത്തില്‍ കോടിയര്‍ച്ചന തുടങ്ങും. രാവിലെ അഞ്ചര മുതല്‍ രാത്രി ഏഴരവരെയുള്ള സമയത്ത് ഇടവേളകളോടെ പത്തുമണിക്കൂറാണ് ഓരോ ദിവസവും അര്‍ച്ചന നടക്കുക. അന്നദാനം, മധുരപലഹാരവിതരണം എന്നിവയുണ്ടാകും. ആഗസ്ത് ആറിന് ഭജനയോടെ ക്ഷേത്രപ്രദക്ഷിണം, തിരുനാമാചാര്യന് അഭിഷേകം എന്നിവയോടെ സമാപിക്കുമെന്ന് ആഞ്ഞം മധുസൂദനന്‍ നമ്പൂതിരി, ജി.കെ. ഗോപാലകൃഷ്ണന്‍, എ. വേണുഗോപാല്‍ എന്നിവര്‍ പത്രസമ്മേളനത്തില്‍ അറിയിച്ചു
ചുരുട്ടിവെക്കാവുന്ന ടെലിവിഷനുമായി എല്‍ജി
മടക്കിക്കെട്ടി കൊണ്ടു പോകാവുന്ന ടെലിവിഷനും വിപണിയില്‍. എല്‍ ജി കമ്പനിയാണ് കുടുംബങ്ങള്‍ക്ക് ഏറെ സൗകര്യപ്രദമായ ടിവിയുമായി രംഗത്തെത്തിയത്. മുമ്പ് വീടു മാറേണ്ടി വരുന്നവര്‍ക്ക് ടെലിവിഷന്‍ കൊണ്ടു പോവുക എന്നത് വിഷമകരമായ ഒരു സംഭവമായിരുന്നു. അതിനും പുതിയ ടെലിവിഷന്റെ വരവോടെ പരിഹാരമായി. ചുരുട്ടിയെടുത്ത് ചെറിയൊരു കാര്‍ബോര്‍ഡ് ട്യൂബിനകത്താക്കി എവിടെയും കൊണ്ടുനടക്കാവുന്ന ടിവിയാണിത്. 18 ഇഞ്ച് വിസ്താരമുള്ള ടിവിയാണിത്. ഇപ്പോഴത്തെ ഫഌറ്റ് സ്‌ക്രീന്‍ ടിവികളുടെ വലിപ്പമനുസരിച്ച് 18 ഇഞ്ച് ഇത്തിരി ചെറുതല്ലേ എന്ന് തോന്നാം. പ്രശ്‌നമാക്കേണ്ട. 2017 ഓടെ ചുരുട്ടിയെടുക്കാവുന്ന 60 ഇഞ്ച് ടിവി രംഗത്തെത്തിക്കാമെന്നാണ് എല്‍ജിയുടെ പ്രതീക്ഷ. ഹൈഡെഫിനിഷന്‍ (എച്ച്ഡി) ക്ലാസില്‍പെട്ട ഡിസ്‌പ്ലേ മിഴിവാണ് ചുരുട്ടിയെടുക്കാവുന്ന ഒ.എല്‍.ഇ.ഡി. പാനല്‍ നല്‍കുന്നതെന്ന് കമ്പനി പറയുന്നു. 1200 ത 810 ആണ് റെസല്യൂഷന്‍. പാനലിനെ വെറും ആറ് സെന്റീമീറ്റര്‍ വ്യാസത്തിലേക്ക് ചുരുട്ടിയെടുക്കാന്‍ കഴിയുമെന്നും കമ്പനി അവകാശപ്പെടുന്നു.
സംസ്ഥാനത്ത് എച്ച് വണ്‍ എന്‍ വണ്‍ പടരുന്നു
തിരു: സംസ്ഥാനത്ത് വീണ്ടും എച്ച് വണ്‍ എന്‍ വണ്‍ പടരുന്നു. ആറുമാസത്തിനിടെ എച്ച് വണ്‍ എന്‍ വണ്‍ ബാധിച്ച് 12 പേര്‍ മരിച്ചു. ലോകാരോഗ്യസംഘടനയുടെ നിര്‍ദേശപ്രകാരം നിരീക്ഷണം ശക്തമാക്കിയതിനാലാണ് രോഗബാധിതരുടെ എണ്ണം കൂടുതലായി റിപ്പോര്‍ട്ട് ചെയ്യപ്പെടുന്നതെന്നാണ് ആരോഗ്യവകുപ്പിന്റെ വിശദീകരണം. രണ്ട് വര്‍ഷത്തെ ഇടവേളയ്ക്ക് ശേഷമാണ് സംസ്ഥാനത്ത് എച്ച്‌വണ്‍എന്‍വണ്‍ ഇത്രയും പടരുന്നത്. വൈറസിന്റെ തദ്ദേശീയമായ വ്യാപനവും, ഒപ്പം മഴയും രോഗപകര്‍ച്ചക്ക് ആക്കം കൂട്ടി. ഗര്‍ഭിണികളടക്കം എണ്ണൂറോളം പേരെ ഇതുവരെ പരിശോധനയ്ക്ക് വിധേയമാക്കിയതില്‍ 51 പേര്‍ക്ക് രോഗം സ്ഥിരീകരിച്ചു. ഒന്നരവയസുകാരന്‍ അടക്കം 12 പേര്‍ മരിച്ചു. ആവശ്യത്തിനുള്ള പ്രതിരോധമരുന്ന് കേന്ദ്രം ലഭ്യമാക്കിയിട്ടുണ്ട്. 2009ലാണ് സംസ്ഥാനത്ത് ആദ്യമായി എച്ച്‌വണ്‍ എന്‍വണ്‍ സ്ഥിരീകരിച്ചത്. അയല്‍സംസ്ഥാനമായ കര്‍ണാടകയില്‍ എച്ച് വണ്‍ എന്‍ വണ്‍ പടര്‍ന്ന് പിടിക്കുന്നതും ആശങ്ക ഇരട്ടിയാക്കുന്നു.
വിട: ഫിലിപ്പ് ലാം
ബെര്‍ലിന്‍ : ജര്‍മനിയെ ലോകകിരീടത്തിലേക്ക് നയിച്ച നായകന്‍ ഫിലിപ്പ് ലാം ദേശീയ ടീമിനോട് വിടപറഞ്ഞു. ഈ ലോകകപ്പില്‍ ജര്‍മനിയെ ചാമ്പ്യന്മാരാക്കിയശേഷം അന്താരാഷ്ട്ര മത്സരങ്ങളില്‍നിന്ന് വിരമിക്കണമെന്ന് നേരത്തേതന്നെ ലാം തീരുമാനിച്ചിരുന്നുവെന്ന് അദ്ദേഹത്തിന്റെ സുഹൃത്തുക്കള്‍ അറിയിച്ചു. അതേസമയം ബയറണ്‍ മ്യൂണിക്കിനുവേണ്ടി ലാം തുടര്‍ന്നും കളിക്കും. സമകാലീന ഫുട്‌ബോളിലെ ഏറ്റവും മികച്ച ഫുള്‍ബാക്കുകളില്‍ മുമ്പനായി ഗണിക്കപ്പെടുന്ന ഈ 30 കാരന്‍ മൂന്ന് ലോകകപ്പുകളില്‍ ജര്‍മനിയുടെ ജേഴ്‌സിയണിഞ്ഞിട്ടുണ്ട്. 113 മത്സരങ്ങളില്‍ ജര്‍മനിക്കുവേണ്ടി കളിച്ച ഈ ഡിഫന്റര്‍ അഞ്ച് ഗോളും നേടിയിട്ടുണ്ട്
ബ്രിട്ടനിലെയുവതികള്‍ ഇപ്പോള്‍ കെയ്റ്റിന് പിന്നാലെ
ബ്രിട്ടനിലെയുവതികള്‍ ഇപ്പോള്‍ കെയ്റ്റ് മിഡില്‍ടണിന് പിന്നാലെയാണ്. കെയ്റ്റ് ആരെന്ന് മനസിലായില്ലേ? എലിസബത്ത് രാജ്ഞിയുടെ കൊച്ചുമകന്‍ വില്യം രാജകുമാരന്റെ ഭാര്യ. ഫാഷനില്‍ രാജ്ഞി തന്നെയാണ് ഈ രാജകുമാരി. എപ്പോള്‍ അണിഞ്ഞൊരുങ്ങി പുറത്തിറങ്ങിയാലും ചാകരയാണ് ഇംഗ്ലണ്ടിലെ ഓണ്‍ലൈന്‍ സ്‌റ്റോറുകള്‍ക്ക്. രാജ്ഞി എന്തുടുക്കുന്നുവോ അതു തന്നെ വേണം ഇംഗ്ലണ്ടിലെ പെമ്പിള്ളേര്‍ക്കും. അടുത്തിടെ കെയ്റ്റ് മിഡില്‍റ്റണ്‍, ബ്ലസ്സ്ഡ് സാക്രമെന്റ് സ്‌കൂള്‍ സന്ദര്‍ശിച്ചത് ഒരൊന്നാന്തരം ചുവപ്പ് വേഷത്തിലാണ്. ഇയോണ്‍ലൈന്‍ ഡോട്ട് കോം റിപ്പോര്‍ട്ട് ചെയ്യുന്നതനുസരിച്ച്, ഓണ്‍ലൈന്‍ സ്‌റ്റോറുകളിലൂടെ നിമിഷനേരം കൊണ്ടാണ് ഇതേ മോഡല്‍ ചുവപ്പ് വസ്ത്രം വിറ്റഴിഞ്ഞത്. അതായത്, കെയ്റ്റ് മടങ്ങി കൊട്ടാരത്തിലെത്തി വസ്ത്രം മാറും മുന്‍പേ സാധനം തീര്‍ന്നുവെന്നര്‍ഥം. ഇതാദ്യമായിട്ടല്ല ബ്രിട്ടനിലെ യുവതികള്‍ കെയ്റ്റിന്റെ ഫാഷന് പിന്നാലെ പോകുന്നതും ഓര്‍ഡറുകളുടെ കാര്യത്തില്‍ സ്‌ഫോടനം സൃഷ്ടിക്കുന്നതും. ഇക്കഴിഞ്ഞ ഏപ്രിലിലും ഉണ്ടായി ഇതേ പോലൊരു സംഭവം. ഓസ്‌ട്രേലിയയിലും ന്യൂസീലാന്റിലും നടത്തിയ പര്യടനത്തില്‍ രാജ്ഞി അണിഞ്ഞ തരം വസ്ത്രം വിറ്റഴിഞ്ഞത് വെറും എട്ടു മിനിറ്റുകള്‍ കൊണ്ടാണ്
ഷഫീഖിന്റെ ജീവിതത്തിനിനി അമ്മത്താരാട്ടിന്റെ സാന്ത്വനം
ഇടുക്കി: ബാപ്പയുടെയും രണ്ടാനമ്മയുടെയും കടുത്ത പീഡനങ്ങളേറ്റുവാങ്ങി മരണത്തോളമെത്തിയ അഞ്ചരവയസ്സുകാരന്‍ ഷെഫീക്കിനെ ഏഴല്ലൂര്‍ അല്‍ അസ്ഹര്‍ കോേളജ് താല്‍ക്കാലികമായി ദത്തെടുത്തു. ‘അമ്മത്താരാട്ട്’ എന്ന മുറിയില്‍ ആയ രാഗിണിയോടൊപ്പമാവും അവന്റെ വാസം. രണ്ടുപേരുടെയും എല്ലാ ചെലവുകളും മാനേജ്‌മെന്റ് വഹിക്കും. കോേളജില്‍ നടന്ന ചടങ്ങില്‍ സാമൂഹികക്ഷേമമന്ത്രി എം.കെ.മുനീര്‍ ഔദ്യോഗികമായി കുട്ടിയെ അല്‍ അസ്ഹറിന് കൈമാറി. മന്ത്രി പി.ജെ.ജോസഫ് അധ്യക്ഷനായിരുന്നു. ഷെഫീക്ക് ഒരു അടയാളമാണെന്ന് മുനീര്‍ പ്രസംഗത്തില്‍ പറഞ്ഞു. നടുക്കടലില്‍ പെട്ടുപോയ ഒരു കൊച്ചുതോണിയെക്കാത്ത് ഒരു വന്‍കരയായി ജനം നിന്നെന്ന് അദ്ദേഹം പറഞ്ഞു. കുഞ്ഞുങ്ങള്‍ക്കെതിരായ ലോകമനസ്സാക്ഷിയുടെ അടയാളമാണിവന്‍. 75 ശതമാനം കാഴ്ചശക്തിയായിട്ടുണ്ട്. നട്ടെല്ലിന്റെ ക്ഷതം മാറാന്‍ ദീര്‍ഘനാള്‍ ഫിസിയോതെറാപ്പി വേണ്ടിവരും. ഹോര്‍മോണ്‍ തകരാര്‍ പരിഹരിക്കാന്‍ കുത്തിവയ്പുകള്‍ വേണം. പതുക്കെപ്പതുക്കെ അവന്‍ ജീവിതത്തിലേക്കു മടങ്ങിവരുമെന്ന് മുനീര്‍ പറഞ്ഞു. തനിക്ക് നാലാമതൊരു കുട്ടികൂടിയായെന്നും മുനീര്‍ പറഞ്ഞു. കുടുംബസമേതമാണ് അദ്ദേഹം ചടങ്ങിനെത്തിയത്. ഷെഫീക്കിന്റെ ആയ രാഗിണിക്ക് അല്‍ അസ്ഹര്‍ കോളജ് ശമ്പളവുംമറ്റും നല്‍കുമെങ്കിലും ഐ.സി.ഡി.എസ്സില്‍ താല്‍ക്കാലിക സൂപ്പര്‍വൈസറായ ഇവര്‍ക്ക് പിന്നീട് ഉയര്‍ന്ന ജോലി ഇതേവകുപ്പില്‍ നല്‍കുന്നത് മന്ത്രിസഭയില്‍ ആലോചിച്ചു തീരുമാനിക്കുമെന്ന് മുനീര്‍ വ്യക്തമാക്കി. എം.എല്‍.എ.മാരായ റോഷി അഗസ്റ്റിന്‍, ജോസഫ് വാഴ്ക്കന്‍, ജില്ലാ പഞ്ചായത്ത് പ്രസിഡന്റ് എം.ടി.തോമസ്, ജില്ലാ ശിശുക്ഷേമസമിതി ചെയര്‍മാന്‍ പി.ജി.ഗോപാലകൃഷ്ണന്‍, അംഗങ്ങള്‍ തുടങ്ങി നിരവധിപേര്‍ പങ്കെടുത്തു. അല്‍ അസ്ഹര്‍ ഗ്രൂപ്പ് ചെയര്‍മാന്‍ കെ.എം.മൂസ സ്വാഗതവും ഡയറക്ടര്‍ കെ.പി.ഷിയാസ് നന്ദിയും പറഞ്ഞു. കഴിഞ്ഞവര്‍ഷം ജൂലായ് 15നാണ് പീഡനവിവരം പുറത്തറിഞ്ഞത്. അതിനുശേഷം ആശുപത്രിവാസവും പുനരധിവാസവുമായി കഴിയുകയാണ് ഷെഫീക്ക്. തുടര്‍ച്ചയായ ചികില്‍സക്ക് ശേഷമാണ് ഷഫീഖ് ജിവിതത്തിലേത്ത് തിരിച്ചെത്തിയത്.
പെണ്‍മനസില്‍ ജയ്പുരി ബാന്ദേജ് സ്‌കര്‍ട്ട്
സ്‌കര്‍ട്ടുകള്‍ എന്നും പ്രിയമാണ്. ശ്രീത്വം തുളുമ്പുന്ന ഛായയാണ് സ്‌കര്‍ട്ടണിഞ്ഞ ഓരോ പെണ്‍കുട്ടിയിലും, ഏറെ സൗകര്യ പ്രദമായ വസ്ത്രമെന്ന സുഖവും. ട്രെന്‍ഡുകള്‍ എത്ര ന്യൂജനറേഷനാ യാലും സ്‌കര്‍ട്ടുകള്‍ ഇന്നും ഭാരതീയതയോടെ മുന്‍നിരയിലുണ്ട്. പരമ്പരാഗത രാജസ്ഥാനി വസ്ത്രമായ ജയ്പുരി ബാന്ദേജ് സ്‌കര്‍ട്ട്, ഗ്രാമീണത തുളുമ്പുന്നടൈ ആന്‍ഡ് ഡൈ സ്‌കര്‍ട്ട്, ഒരേസമയം മോഡേ ണും ബബ്ലിയുമായ ലെയേഡ് സ്‌കര്‍ട്ട് എന്നിവയൊക്കെ വീണ്ടും മുന്നോട്ടു കടന്നുവന്നിരിക്കുന്നു. ഒപ്പം പുതിയ ട്രെന്‍ഡുകളായ മാക്‌സി സ്‌കര്‍ട്ടുകളും , ട്യൂബ്‌സ്‌കര്‍ട്ടുകളും, സ്‌ട്രെയ്റ്റ് സ്‌കര്‍ട്ടും ടുലിപ് ഹെം സ്‌കര്‍ട്ടുകളുമെല്ലാം പുതുതായി രംഗം പിടിച്ചെടുത്തിരിക്കുന്നു. നിറങ്ങള്‍ വസന്തം തീര്‍ക്കുന്ന ജയ്പുരി ബാന്ദേജ് സ്‌കര്‍ട്ട് വെള്ള, റോസ് മുതലായ പേസ്റ്റല്‍ നിറങ്ങളിലെ ടോപ്പിനൊപ്പമാണ് ഭംഗിയാകുക. ബ്ലാക്ക്, ബ്രൗണ്‍ മുതലായ എര്‍ത്തി നിറങ്ങളിലെ പ്ലെയിന്‍ ടോപ്പുകളും ഇവയ്‌ക്കൊപ്പം യോജിക്കും. ടൈ ആന്‍ഡ് ടൈ തുണിത്തരങ്ങളിലെ സ്‌കര്‍ട്ടുകളും ഇതുപോലെ തീര്‍ത്തും ദേശി സ്‌റ്റൈല്‍ ആണ്. ടോപ്പുകള്‍ക്കൊപ്പം മാത്രമല്ല, ട്യൂണിക്കുകള്‍ക്കൊപ്പവും കുര്‍ത്തികള്‍ക്കൊപ്പവും ഇവ ധരിക്കാം. ലെയേഡ് സ്‌കര്‍ട്ടുകള്‍ ഏറെയും കൗമാരക്കാരികള്‍ക്കാണ് യോജി ക്കുക. നീളന്‍ ലെയേഡ് സ്‌കര്‍ട്ടും കൊച്ചു ലെയേഡ് സ്‌കര്‍ട്ടും ഒരുപോലെ ട്രെന്‍ഡിയാണ്. മാക്‌സി സ്‌കര്‍ട്ടിനൊപ്പം ക്രോപ് ടോപ്പു കള്‍ അണിയുന്നത് ഇപ്പോള്‍ പാര്‍ട്ടിവെയര്‍ പോലുമായി കഴിഞ്ഞിരിക്കുന്നു. മാക്‌സി സ്‌കര്‍ട്ടില്‍ തന്നെ സ്‌ട്രെയ്റ്റ് കട്ട് സ്‌കര്‍ട്ടുകളാണ് മറ്റൊരുഹരം. പുത്തന്‍ പുതിയ അവതാരങ്ങളായി രംഗത്തിറങ്ങിയിരിക്കുന്നത് ടുലിപ് ഹെം സ്‌കര്‍ട്ടും നീളന്‍ ഡിവൈഡഡ് സ്‌കര്‍ട്ടുകളുമാണ്. ടുലിപ് പുഷ്പത്തിന്റേതുപോലെ അറ്റം ‘റ ആയി വളഞ്ഞിരിക്കുന്ന രണ്ടു ഫഌപ്പുകളാണ് ഈ സ്‌കര്‍ട്ടിലേത്. ടുലിപ് സ്‌കര്‍ട്ടിന് നീളം കൂടാതിരിക്കുന്നതാണ് ഭംഗി.
പ്ലസ് ടു ; എകാഭിപ്രായമില്ല: മന്ത്രി അബ്ദുറബ്ബ്
തിരു: സംസ്ഥാനത്ത് പുതിയ പ്ലസ് ടു സ്‌കൂളുകളും അധിക ബാച്ചുകളും അനുവദിക്കുന്നത് പരിഗണിക്കുന്ന ഉപസമിതിയില്‍ ഏകാഭിപ്രായം ഇതുവരെ ഉണ്ടായില്ലെന്ന് വിദ്യാഭ്യാസ മന്ത്രി പി.കെ.അബ്ദുറബ്ബ്. ഇന്നത്തെ ഉപസമിതി യോഗത്തില്‍ തീരുമാനം ഉണ്ടാവുമെന്നാണ് കരുതുന്നതെന്നും അദ്ദേഹം പറഞ്ഞു. പ്ലസ് ടു വിഷയം സംബന്ധിച്ച് മുഖ്യമന്ത്രി ഉമ്മന്‍ചാണ്ടിയുമായി ചര്‍ച്ച നടത്തി. പ്രശ്‌നം ഉടന്‍ തന്നെ പരിഹരിക്കാനാവുമെന്നാണ് പ്രതീക്ഷിക്കുന്നതെന്നും അബ്ദുറബ്ബ് പറഞ്ഞു
മോസ്‌കോയിലേക്ക് എയര്‍ ഇന്ത്യ സര്‍വീസ് ആരംഭിക്കുന്നു
മുംബൈ: പതിനഞ്ച് വര്‍ഷത്തെ ഇടവേളക്ക് ശേഷം എയര്‍ ഇന്ത്യ മോസ്‌കോയിലേക്ക് നേരിട്ടുള്ള സര്‍വീസ് പുനരാരംഭിക്കുന്നു. യാത്രക്കാരുടെ നിരന്തരമായ അഭ്യര്‍ഥന മാനിച്ചും ഇന്ത്യയും റഷ്യയും തമ്മിലുള്ള നല്ല ബന്ധം പരിഗണിച്ചുമാണ് ഡല്‍ഹി-മോസ്‌കോ സര്‍വീസ് പുനരാരംഭിക്കുന്നതെന്ന് എയര്‍ ഇന്ത്യ ചെയര്‍മാന്‍ രോഹിത് നന്ദന്‍ പറഞ്ഞു. ഇരു രാജ്യങ്ങളിലേക്കുമായി ഏകദേശം 10000 പേര്‍ ഓരോ മാസവും യാത്ര ചെയ്യുന്നുണ്ട്. അതിനാല്‍ സര്‍വീസ് ലാഭകരമായിരിക്കുമെന്നാണ് കരുതുന്നതെന്നും അദ്ദേഹം പറഞ്ഞു. ചില പ്രായോഗീക ബുദ്ധിമുട്ടുകള്‍ കാരണമാണ് 15 വര്‍ഷം മുമ്പ് ഡല്‍ഹി-മോസ്‌കോ സര്‍വീസ് എയര്‍ ഇന്ത്യ നിര്‍ത്തിയത്
പുതു സ്റ്റൈലില്‍ സണ്ണി വരുന്നു
പുതു മോഡിയില്‍ നിസാന്റെ സണ്ണി വീണ്ടും വിപണയിയിലെത്തുന്നു. മൂന്ന് വര്‍ഷങ്ങള്‍ക്ക് ശേഷമാണ് സണ്ണിയുടെ പുതിയ പതിപ്പുമായി നിസാന്‍ വീണ്ടുംവരുന്നത്. പെട്രോള്‍, ഡീസല്‍ എനജിനുകളിലായി സണ്ണിയുടെ എട്ട് വേരിയന്റുകളാണ് പുതുതായി അവതരിപ്പിക്കുന്നത്. പുതിയ രൂപവും പുത്തന്‍ ഫീച്ചറുകളും ആയുധമാക്കിയാണ് സണ്ണിയുടെ വരവ്. ഹോണ്ട സിറ്റി, ടാറ്റ മാന്‍സ, ഹ്യൂണ്ടായ് വെര്‍ണ, ഫോക്‌സ്‌വാഗണ്‍ വെന്റോ എന്നിവയോടാകും വിപണിയില്‍ സണ്ണി ഏറ്റുമുട്ടുക. പെട്രോള്‍ മോഡലിന് 6.99 ലക്ഷം രൂപ മുതലും ഡീസല്‍ മോഡലിന് 7.99 ലക്ഷം രൂപ മുതലുമാണ് എക്‌സ് ഷോറൂം വില. 2011 സെപ്തംബറിലാണ് നിസാന്‍ സണ്ണിയെ ആദ്യമായി വിപണിയിലിറക്കുന്നത്. പെട്രോള്‍ എന്‍ജിനിലായിരുന്നു തുടക്കം. ആ വര്‍ഷം ഡിസംബറില്‍ സണ്ണിയുടെ ഡീസല്‍ മോഡലും ഇന്ത്യന്‍ വിപണിയിലെത്തി. നിസാന്‍ നിര്‍മ്മിച്ച ആദ്യ മീഡിയം സൈസ് സെഡാനായിരുന്നു സണ്ണി
